LANGEBAAN – West Point Processors en die Nasionale Seereddingsinstituut (NSRI) het op Dinsdag 22 September hul 25-jarige vennootskap gevier met ‘n tjekoorhandiging.
Die jarelange vennootskap met NSRI is hernu met ’n verdere verbintenis van R810 000 oor die volgende drie jaar.
Die mylpaal is by NSRI-stasie 4 Mykonos gevier, waar West Point sy R220 000-bydrae vir 2026 oorhandig en ’n nuwe driejaar-Platinumvennootskap vir 2027 tot 2029 onderteken het. Dit bring die maatskappy se totale steun oor die vierjaarperiode tot meer as R1 miljoen.
Die verhouding dateer terug na 2001 toe die destydse Saldanha Groep sy eerste bydrae aan die NSRI gemaak het.
Ondanks verskeie korporatiewe veranderinge, insluitend Sea Harvest se 2024-verkryging van Terrasan se pelagiese visvangbesigheid, het die ondersteuning voortgeduur. West Point het in 2018 Platinumvennootstatus bereik.
Mike Vonk, uitvoerende hoof van die NSRI, het gesê min vennootskappe duur 25 jaar. “Vir West Point en Sea Harvest verskaf die see ‘n bestaan. Vir die NSRI is ons verantwoordelikheid om te verseker dat mense wat see toe gaan, die beste moontlike noodreaksie kry,” het hy gesê.
Lynn Boshoff, uitvoerende hoof van West Point Processors, het gesê die maatskappy is trots om die verhouding voort te sit. Die befondsing ondersteun onder meer beskermende toerusting vir vrywillige reddingspanne, waterveiligheids- en oorlewingswemprogramme vir kinders, asook veiligheidsopleiding vir kleinskaalse vissers.
Terence Brown, bedryfsdirekteur van Sea Harvest Saldanha, het gesê die see is sentraal tot die maatskappy en die gemeenskappe wat daarvan afhanklik is.Stasie 4 Mykonos is een van die NSRI se besigste vrywillige stasies.
In 2025 het sy bemanning 49 reddingsoperasies uitgevoer en 37 mense gehelp.
Teen middel September vanjaar was daar reeds 29 reddingsoperasies, waartydens 19 mense gehelp is.
Vonk het sy dank uitgespreek en gesê maatskappye soos West Point se ondersteuning maak die NSRI se reddings- en waterveiligheidswerk moontlik.
