Die West Coast Blues Seniors het hul staal gewys by die Forward Faster 7’s-toernooi in Stellenbosch waar hulle tussen Saterdag 24 en Sondag 25 Oktober ‘n vierde plek behaal het.

Die seniors het in die kwarteindronde die gunstelinge uitgeskakel om hul plek onder die top-vier te verseker.

Hoewel hulle nie daarin kon slaag om die eindstryd te haal nie, het hul vertoning hul mededingendheid en vasberadenheid op die rugbyveld beklemtoon.

Die klub se o.17-juniorspan het ook uitstekend gevaar en die toernooi in die derde plek afgesluit.

Die West Coast Blues bring spelers van verskeie dorpe aan die Weskus byeen en bied só aan plaaslike rugbytalent die geleentheid om die streek op ‘n groter verhoog te verteenwoordig.

Agter die spanne se prestasies staan ‘n toegewyde bestuur- en afrigtingspan wat ‘n belangrike rol in die voorbereiding en ondersteuning van die spelers speel.

Die senior span se afrigters, Gursh Gurah en Hesron Haupt, het saam met die bestuurder Grazian du Toit en medikus Andrew Blake tot die span se deelname aan die toernooi bygedra.

Die o.17-span se afrigters, Gerhard Ehlers en Thurlow Meintjies, het eweneens ‘n belangrike rol gespeel.

Meintjies het ook as bestuurder opgetree, terwyl die medikus Roystan Jordaan die junior spelers se ondersteuning en welstand help verseker het.

Die samewerking tussen die spelers, afrigters, bestuur en mediese personeel weerspieël die gesamentlike poging om die klub te versterk en Weskus-rugby se naam hoog te hou.

Die Blues se seisoen duur voort, met die spanne wat tot Januarie volgende jaar aan verskeie toernooie sal deelneem.

Hul vertonings in Stellenbosch bied goeie momentum vir die uitdagings wat voorlê.

LEES OOK: West Coast Blues 7s supports Diazville High School