Baie mense beskou hul troeteldiere as deel van die gesin, en dit is natuurlik om te wil deel wanneer ons eet. Daardie groot oë kyk jou aan, en ‘n stukkie van die tafel lyk onskuldig. Ongelukkig is daar baie kosse wat vir mense veilig is, maar gevaarlik, soms selfs dodelik vir honde en katte. Vergiftiging gebeur dikwels per ongeluk, veral in huise waar kos maklik toeganklik is, of waar troeteldiere by vullis of koskaste kan uitkom. Om te weet watter kosse gevaarlik is, kan letterlik ‘n lewe red.

Algemene menslike kos wat gevaarlik is Sjokolade is een van die bekendste gevare vir honde. Dit bevat teobromien, ‘n stof wat honde nie kan afbreek nie. Donker sjokolade en bak-sjokolade is veral gevaarlik en kan braking, bewing, aanvalle en selfs die dood veroorsaak.

Katte eet selde sjokolade, maar dit bly steeds gevaarlik.

Koffie en tee bevat kafeïen en kan soortgelyke simptome veroorsaak. Honde kan maklik ‘n koppie insluk of ‘n stukkie daarvan oplek.

Uie, knoffel en preie – rou, gaar of in poeiervorm – kan rooibloedselle beskadig en bloedarmoede, swakheid en asemhalingsprobleme veroorsaak. Selfs klein hoeveelhede oor tyd kan skade doen. Baie mense dink ‘n bietjie in kos is onskadelik, maar gereelde klein hoeveelhede kan ernstige gesondheidsprobleme veroorsaak. Sop, sousblokkies, wors, polonie en ander gekruide kos bevat dikwels uie of knoffel, en moet dus nie gedeel word nie.

Druiwe en rosyne is nog ‘n groot risiko, veral vir honde. Die presiese gifstof is onbekend, maar dit kan akute nierversaking veroorsaak. Sommige honde word baie siek ná net ‘n paar rosyne, terwyl ander niks oorkom nie. Simptome sluit lusteloosheid, braking en min of geen urine in. Katte eet dit selde, maar dit bly ‘n risiko as dit rondlê.

Gevaarlike drank en soetgoed:

Alkohol is uiters giftig vir troeteldiere. Selfs ‘n klein hoeveelheid bier, wyn of spiritus kan braking, diarree, koördinasieprobleme, koma en selfs die dood veroorsaak.

Rou gisdeeg is ook gevaarlik, omdat dit in die maag kan uitsit en alkohol produseer.

Kunsmatige versoeters soos xylitol, dikwels in suikervrye lekkers en gebak, kan vinnig bloedsuiker laat daal en lewerversaking veroorsaak.

Baie mense besef nie hoe algemeen dit is nie, daarom is dit ‘n groot risiko in talle huishoudings.

Bene, vet en gaar kosreste:

Daar is ‘n mite dat honde veilig bene kan kou. Gaar hoender-, skaap- of varkbene kan maklik splinter en die keel, maag of ingewande beskadig. Dit kan selfs tot verstikking lei. Rou bene moet met kennis en versigtigheid gegee word – beslis nie sommer uit die pot nie.

Vet kos en kosreste, veral olierig of gebraai, kan pankreatitis veroorsaak. Dit is pynlik en gevaarlik en kan braking, diarree en ernstige siekte meebring. Katte is ook sensitief vir vetterige kos, alhoewel hulle soms ‘n happie sal steel.

Gevaarlike Kos vir veral katte:

Katte het unieke voedingsbehoeftes. Melk lyk onskul- dig, maar meeste katte is laktose-onverdraagsaam en kan diarree en maagpyn kry. Rou vis en rou eiers kan ook probleme veroorsaak. Rou vis bevat ensieme wat vitamien B1 afbreek en neurologiese probleme kan veroorsaak. Rou eiers dra ‘n risiko van salmonella en kan opname van voedingstowwe belemmer.

Hondekos is nie geskik vir katte nie, omdat dit nie ge- noeg taurien bevat nie – ‘n noodsaaklike voedingstof. Katte wat oor tyd hondekos eet, kan ernstige gesondheids- probleme ontwikkel.

Katkos is te ryk vir honde en kan gewigstoename en maagprobleme veroorsaak.

Wat om in nood te doen:

As jy vermoed jou hond of kat het iets gevaarlik geëet, kontak so gou as moontlik ‘n veearts of dierekliniek.

Moenie self probeer om braking te veroorsaak nie, tensy ‘n professionele persoon dit aanbeveel.

Liefde vir jou troeteldier beteken nie om alles met hulle te deel nie. Dit beteken om hulle te beskerm, selfs al is dit moeilik om nee te sê. Deur te weet wat jou hond of kat nie mag eet nie, neem jy ‘n eenvoudige maar kragtige stap om hulle gesond, veilig en vir langer by jou te hou.