Met die Paasnaweek wat voorlê, is dit ‘n kwessie van almal aan boord om ‘n veilige naweek vir Weskussers en besoekers te skep. Verskeie rolspelers, insluitend verkeer, wetstoepassing, sekuriteit, ambulansdienste en ander, sal hoogs sigbaar wees op verskeie paaie in die Weskus om veiligheid vir almal te verseker.

Die Saldanhabaai-munisipaliteit se Saldanhabaai-veiligheidsinisiatief (SBSI) en alle betrokke rolspelers, bevestig hul volle operasionele gereedheid vir die komende Paasnaweek.

Op Dinsdag 31 Maart is die finale Geïntegreerde Paasnaweek-Gereedheidsvergadering gehou, waar sleutelrolspelers byeengekom het om hulpbronne te belyn, operasionele planne te finaliseer en ‘n gekoördineerde reaksie te verseker op die verwagte toename in reis, toerisme en openbare byeenkomste oor die streek heen.

Met die aanloop na die Paasnaweek het die Weskus reeds verskeie ongelukke op die paaie ervaar, iets waaroor baie mense bekommerd is.

Padveiligheid en verkeershandhawing bly een van die grootste fokusgebiede, met hoësigbaarheidspatrollies, padblokkades en geen genade vir roekelose of nalatige bestuurders nie.

Terselfdertyd word verskerpte optrede teen bestuur onder die invloed uitgevoer om drink-en-bestuur-verwante ongelukke te voorkom. Misdaadvoorkoming is ook ‘n prioriteit, met verhoogde polisiëring in brandpuntgebiede, openbare ruimtes en toeriste-aantreklikhede.

Strand- en openbare ruimtes sal noukeurig gemonitor word om nakoming van munisipale verordeninge en veiligheid te verseker. Noodreaksie-gereedheid word bevorder deur die strategiese ontplooiing van brand-, reddings- en mediese dienste vir vinnige reaksie op enige noodgevalle. Verder word geïntegreerde operasies oor die distrik heen uitgevoer om reg en orde te handhaaf deur multi-dissiplinêre optredes.

Joey Pieters, koördineerder van die Saldanhabaai-veiligheidsinisiatief, maan inwoners en besoekers om verantwoordelik op te tree en saam met rolspelers te werk om enige voorvalle te voorkom.

“Moenie drink en bestuur nie. Daar sal geen genade wees nie – oortreders sal toegesluit word. Gehoorsaam alle verkeerswette, respekteer wetstoepassers, beplan jou reise verantwoordelik, vermy onnodige risiko’s op die pad, tree verantwoordelik op in openbare ruimtes, hou by alle veiligheidsreëls en kyk uit vir mekaar. Veiligheid is almal se verantwoordelikheid. Hierdie Paasnaweek is ons boodskap duidelik: jou veiligheid is ons prioriteit, maar jou keuses maak die verskil.”

Pieters voeg by dat samewerking lewens beskerm, tragedies voorkom en verseker dat Saldanhabaai ‘n veilige bestemming vir almal bly.