PIKETBERG – ‘n Groener en mooier toekoms vir Piketberg is op Saterdag 5 September geplant toe inwoners en rolspelers by Rainbow Park in die nuwe uitbreiding van die dorp byeengekom het vir ‘n besondere boomplantdag.

Die inisiatief is deur die Piket-Bo-Berg Inwoners Vereeniging, as hoofborg en dryfkrag agter die projek, ondersteun.

Die dag het inwoners die geleentheid gebied om saam hande te vat en ’n sigbare verskil in hul onmiddellike omgewing te maak.

Die aanplant van die bome is volgens die organiseerders meer as net ‘n poging om die gebied te verfraai. Dit is ook ’n belegging in die omgewing en die toekomstige leefbaarheid van die gemeenskap.

Namate die bome groei, sal dit mettertyd skadu, kleur en groen ruimtes bied waar inwoners kan ontspan en die buitelewe geniet. Die bome simboliseer terselfdertyd groei, samewerking en die gemeenskap se verbintenis tot ‘n beter en meer leefbare Piketberg.

Die boomplantdag het ook die waarde van gemeenskapsbetrokkenheid beklemtoon. Wanneer inwoners, organisasies en ander rolspelers saamwerk, kan klein inisiatiewe volgens die betrokkenes tot sigbare en blywende verandering in ‘n gemeenskap lei.

Die Piketberg Gemeenskapspolisiëringsforum het sy steun vir die inisiatief uitgespreek en gesê dit is trots om gemeenskapsprojekte van dié aard te ondersteun.

Vir Piketberg se inwoners is die nuwe groen ruimtes ‘n herinnering dat ‘n gemeenskap se toekoms letterlik saam geplant kan word, een boom op ‘n slag.