Is daar nog hoop vir alkoholiste?
Volgens Monique Bolton is die antwoord eenvoudig: Ja, daar is hoop!
“Vir baie mense is alkohol net iets wat saam met vriende geniet word, maar vir sommige mense is dit heeltemal anders. Hulle kan nie beheer wat gebeur wanneer hulle begin drink nie. Sodra hulle die eerste drankie neem, ontstaan ‘n intense drang na meer.
Volgens die Wêreldgesondheidsorgorganisasie word alkoholafhanklikheid as ‘n mediese toestand beskou wat die brein en gedrag beïnvloed. Gesondheidsorgpersoneel gebruik verskeie behandelingsmetodes, insluitend ontgifting en berading om mense van alkoholafhanklikheid te help herstel.
Die Nasionale Instituut vir Alkoholmisbruik en Alkoholisme glo herstel is egter nie net ‘n fisieke proses nie, maar behels ook emosionele, gedrags- en sosiale verandering. Die ontstaan van Alkoliste Anoniem (Alcoholics Anonymous) word teruggevoer na die 1930’s toe Bill Wilson, ná verskeie onsuksesvolle behandelingspogings, ‘n geestelike ervaring gehad het wat hom gehelp het om nugter te bly.
Saam met dr. Bob Smith het hy begin om ander alkoholiste te ondersteun. AA het hieruit ontstaan – ‘n wêreldwye gemeenskap waar mense mekaar help om nugter te bly en herstel te ondersteun.
Bolton sê die beginsel van AA is eenvoudig – een alkoholis help ‘n ander. Lede deel hul ervaring, krag en hoop met mekaar. Hulle glo herstel is moontlik wanneer iemand erken hy kan nie die probleem alleen oorkom nie en is bereid om hulp te aanvaar. “AA is nie aan enige spesifieke godsdiens verbind nie. Almal word aangemoedig om sy of haar eie begrip van ‘n Hoër Mag te ontwikkel. Geen lidmaatskapfooie word betaal nie en niemand word betaal vir die werk wat hulle doen nie.”
Miljoene mense wêreldwyd het ‘n nuwe lewe deur AA gevind. “Mense wat hul gesinne, werk, gesondheid en selfrespek verloor het, het weer hoop en ‘n doel,” sê Bolton.
Die boodskap is nog dieselfde: Alkoholisme hoef nie die einde van die pad te wees nie. Herstel is moontlik, en hulp is beskikbaar.
“Daar is altyd hoop,” glo Bolton.
