Noluvu Ludidi
‘n Skoolhoof van Piketberg, wat haar op sosiale media oor ‘n ander skool in die omgewing uitgespreek het, het ‘n herrie veroorsaak.
Mariëtte Koen, die hoof van die Hoërskool Piketberg, se kommentaar oor leer-
ders van die Steynville Sekondêre Skool, het die gemeenskap ontstel.
Volgens een ouer het die boodskap op Whatsapp gesirkuleer en dit het glo gelui die leerders van Steynville Sekondêr “is vuil, hul skool is vuil, hulle weet van niks nie en skryf teen hul skool se mure”.
Volgens Hashim Scheepers, ‘n plaaslike aktivis in die Weskus, het die opmerkings wat glo deur die skoolhoof gemaak is, die gemeenskap woedend gemaak en diep aanstoot gegee onder die laer- en hoërskole in Steynville. Die skoolhoof het glo verskoning gevra by die skoolhoof van Steynville Sekondêr, maar Scheepers voel egter meer moet gedoen word.
“Hierdie is nie tongvalshede nie – dit is rassisties, doelbewus en maak diep seer. Elke leerder, ouer en onderwyser in Steynville word beledig. ‘n Stil verskoning aan ‘n paar skoolhoofde is betekenisloos as die vernedering in die openbaar was.
“Die Wes-Kaapse Onderwysdepartement (WKOD) praat hard oor transformasie en respek, maar wanneer rassisme onder hul toesig plaasvind, doen hulle niks. Ek het geen vertroue dat hulle nou sal optree nie en dit is presies hoekom rassisme in ons skole floreer,” het Scheepers gesê.
Millicent Merton, ‘n woord-
voerder van die WKOD, sê egter die Hoërskool Piketberg het onlangs hul ablusie-
geriewe opgeknap.
“Die skoolhoof was ontsteld toe sommige van die nuut opgeknapte toilette gevandaliseer is. Sy het die saak met die leerders bespreek en Steynville Sekondêr genoem as nog ‘n skool wat soortgelyke uitdagings in die gesig staar. Dit het ontsteltenis in die gemeenskap veroorsaak. Die skoolhoof het ‘n skriftelike verskoning aan Steynville Sekondêr gestuur omdat hulle die skool se naam genoem het toe hulle vandalisme by die Hoërskool Piketberg aangespreek het. Die distrik ondersoek die saak,” het sy bygevoeg.
Scheepers het gewaarsku indien die WKOD versuim om beslissend en in die openbaar op te tree, dit ‘n duidelike boodskap sal stuur dat rassisme deur senior opvoeders in die Wes-Kaap geduld word. “Die gemeenskap doen ‘n beroep op die WKOD om die skoolhoof te skors, ‘n volledige dissiplinêre proses in te stel en ‘n openbare verskoning aan die Steynville-leerders, ouers en opvoeders te vra. Enigiets minder sal gesien word as die beskerming van rassisme en die verraaiing van die waardes wat skole veronderstel is om te handhaaf,” het Scheepers gesê.
