Langebaan-inwoner Peter Huxham en sy vriend Frik Potgieter van George is vrygelaat ná meer as twee jaar van onwettige aanhouding in Ekwatoriaal-Guinee.
Die families van Huxham en Potgieter het bevestig die twee onskuldige Suid-Afrikaanse ingenieurs, wat sedert 9 Februarie 2023 onwettig aangehou is, is vrygelaat en is veilig op Suid-Afrikaanse bodem. Hulle het laat Saterdag (21 Junie) geland.
Hul vrylating volg op ‘n kwytskelding van die president van Ekwatoriaal-Guinee, waarvoor die families uiters dankbaar is.
Dit bring ‘n einde aan ‘n aangrypende beproewing van angs, onsekerheid en onwrikbare pogings deur baie om hul vryheid te verseker.
Huxham en Potgieter en hul families staan tans geen onderhoude toe nie, maar het ‘n persverklaring uitgereik.
Volgens die verklaring, geskryf deur Sandra Sowray, het die Verenigde Nasies se werkgroep oor arbitrêre aanhouding In Julie 2024 bevind Huxham en Potgieter se gevangenisstraf is arbitrêr, onwettig en in stryd met verskeie internasionale menseregteverpligtinge. Die VN het destyds ook vir hul onmiddellike vrylating gevra.
“Ons is oorweldig met vreugde en verligting. Die afgelope twee jaar en vier maande was ondenkbaar pynlik vir albei families. Vandag kan ons uiteindelik sê: ‘Frik en Peter is veilig terug by die huis’,” het die familiewoordvoerders Shaun Murphy en Francois Nigrini gesê.
Die families het hul diepste waardering uitgespreek teenoor almal wat onvermoeid agter die skerms gewerk het, insluitend Huxham en Potgieter se werkgewer, SBM Offshore, die Suid-Afrikaanse en Verenigde Koninkryk se regerings, internasionale diplomatieke vennote, parlementariërs, regspanne, Hostage International en ander burgerlike samelewingsorganisasies asook die media. Hulle is ook dankbaar teenoor Naledi Pandor, die voormalige minister van internasionale betrekkinge, en Ronald Lamola, die huidige minister van internasionale betrekkinge, wat Ekwatoriaal-Guinee as gesante vir die president van Suid-Afrika, Cyril Ramaphosa, besoek het.
Hulle het ook die tienduisende individue wêreldwyd, wat petisies onderteken het, media-voorspraak ondersteun het, emosionele ondersteuning gebied het en vir hul veilige terugkeer gebid het, bedank.
“Hul terugkeer huis toe is die resultaat van gesamentlike pogings oor baie, baie maande, en ons is innig dankbaar teenoor almal wat ‘n rol gespeel het om hul vryheid te verseker.
“Dit was ‘n lang en moeilike reis. Ons wil elkeen wat saam met ons gestaan het, bedank – jul ondersteuning het ons deur ons donkerste oomblikke gedra.
Ons vra nou respek vir privaatheid en ruimte terwyl Frik, Peter en hul families die reis van genesing begin,” het die families gesê.
You must be logged in to post a comment.