Robinvale se matrieks skop stof in Saxonsea se oë

Die jongste matriekuitslae vir 2025 van Atlantis se vier sekondêre skole toon uitmuntende verbeterings, maar ook ’n skerp daling by een skool.

Robinvale Hoërskool het met die jongste matriekeksamen stof in Saxonsea se oë geskop en sodoende die afgelope nege jaar se topskool van die troon gestoot.

Robinvale het die hoogste slaagsyfer in die dorp behaal en vir die eerste keer in ’n dekade Saxonsea Sekondêre Skool verbygesteek. Laasgenoemde was die afgelope paar jaar die topskool, maar behou steeds sy plek as ’n standhoudende pilaar van prestasie.

Robinvale Hoërskool kry vir die eerste keer in tien jaar erkenning as die beste skool in Atlantis met ’n verstommende slaagsyfer van 96.6%. Die opwaartse kurwe spreek boekdele: 85.1% in 2023, 89.3% in 2024 en nou 96.6% in 2025. Volgens skoolhoof Vaughan Murray het ’n kombinasie van toegewyde personeel en sterk gemeenskapsbetrokkenheid die skool se prestasie na nuwe hoogtes geneem.

Saxonsea Sekondêre Skool het oor die jare sy plek as ’n standhoudende pilaar in Atlantis bevestig. Met slaagsyfers van 94.6% in 2023, 93.8% in 2024 en 95.0% in 2025 bly die skool ’n simbool van volgehoue uitnemendheid. Hoewel dit net 1.6% agter Robinvale geëindig het, toon Saxonsea steeds die bestendige prestasie waarop die gemeenskap kan staatmaak.

Proteus Sekondêre Skool het die grootste sprong gemaak. Van ’n beskeie 70.8% in 2023 het die skool in 2024 na 90.9% geklim en in 2025 verder verbeter na 92.0%. “Hierdie dramatiese opwaartse kurwe wys wat moontlik is met hernude toewyding en doelgerigte akademiese programme,” het skoolhoof Hilton Smith gesê.

Atlantis Senior Sekondêre Skool het ’n slaagsyfer van 69.2% in 2023, verbeter na 80.4% in 2024, maar het in 2025 teruggesak na 73.3%. Die afname beklemtoon die behoefte aan volhoubare ondersteuning en sterker strukture om leerderprestasie te stabiliseer.