Die Atlantis-Thusong-sentrum se toekoms as ‘n belangrike diensleweringspunt is ‘n stap nader aan sekerheid nadat die Stad Kaapstad die skenking van die eiendom aan die Wes-Kaapse regering goedgekeur het.
Die transaksie sal die provinsiale regering in staat stel om eienaarskap, bestuur en bedryf van die sentrum oor te neem, terwyl noodsaaklike openbare en maatskaplike dienste daar voortgaan.
Die Wes-Kaapse departement van maatskaplike ontwikkeling beplan om die sentrum as ‘n diensleweringspunt vir Atlantis te gebruik, met kantore en ruimtes waar inwoners vir verskeie dienste om hulp en raad kan aanklop.
Sassa sal ook op die perseel bly, wat beteken inwoners sal steeds tot belangrike maatskaplike ondersteuning en toelaedienste toegang hê.
Die raadsheer James Vos, die burgemeesterskomiteelid vir ekonomiese groei, sê die doel is om seker te maak openbare eiendom bied die grootste moontlike voordeel vir die gemeenskap.
“Hierdie skenking is ‘n belangrike stap om die voortgesette gebruik van die perseel vir noodsaaklike maatskaplike en openbare dienste te verseker,” het Vos gesê.
Tertuis Simmers, die Wes-Kaapse minister van infrastruktuur, het die ooreenkoms as ‘n voorbeeld van samewerking tussen regeringsvlakke beskryf. Volgens hom sal dit belangrike fasiliteite beskerm en Sassa se teenwoordigheid op die perseel verseker.
LEES OOK: https://novanews.co.za/weskusnuus/thusong-sentrum-nie-meer-verkoop/
Wendy Kaizer-Philander, die minister van maatskaplike ontwikkeling, het gesê die ooreenkoms bied inwoners sekerheid dat noodsaaklike dienste sal voortgaan en verder uitgebou kan word.
Hoewel openbare deelname nie wetlik vereis word vir ‘n eiendomsoordrag tussen staatsorgane nie, sê die Stad en provinsiale regering hulle erken die gemeenskap se belang by die proses en sal deursigtig daaroor kommunikeer.
Oordrag volgende
Die volgende stap is die finalisering en ondertekening van die skenkingsooreenkoms tussen die Stad en die Wes-Kaapse regering. Die provinsiale regering moet eers sy interne goedkeuringsproses voltooi. Daarna sal transportprokureurs aangestel word om die oordrag te hanteer. Die proses sal afgehandel word wanneer die eiendom by die aktekantoor geregistreer is.
