Groter vleis- en vee-invoere uit buurlande kan plaaslike pryse onder druk plaas en boere se winsgewendheid bedreig, het die Rooivleisforum gewaarsku.

Die forum het gesê die Suid-Afrikaanse regering moet versigtig wees om nie die plaaslike rooivleisbedryf verder onder druk te plaas deur groter hoeveelhede lewende hawe uit Namibië en Botswana toe te laat nie.

Die waarskuwing kom te midde van bek-en-klouseer-uitbrake (BKS) in die twee buurlande.

Volgens Friedl von Maltitz, voorsitter van die Rooivleisforum, ‘n inisiatief van Vrystaat Landbou, kan ‘n toename in die invoer van kalwers, afgeronde beeste en skape ‘n ooraanbod op die plaaslike mark veroorsaak.

Dit kan veepryse laat daal en Suid-Afrikaanse produsente se inkomste beïnvloed.

Die waarskuwing volg nadat die Namibiese Landbou-unie aangedui het dat daar met Suid-Afrika ooreengekom is oor die uitvoer van vleis en lewende diere uit gebiede wat vry van BKS is.

Von Maltitz sê die moontlikheid dat Namibië en Botswana hul uitvoere na Suid-Afrika verhoog indien BKS-beperkings hul toegang tot ander markte beperk, wek kommer oor die gevolge vir plaaslike veeboere.

“Die potensiële gevolge vir plaaslike produsente moet deeglik oorweeg word voordat enige invoerbesluite geneem word,” sê hy.

LEES OOK: Rolspelers neem regstappe om reuse-impak van bek-en-klouseer te stuit

Skaapprodusente kan volgens die forum besonder kwesbaar wees. Meer lammers is vanjaar reeds uit Namibië ingevoer as gedurende dieselfde tydperk verlede jaar.

Verdere toenames kan volgens die forum plaaslike skaapboere se posisie op die mark verswak.

Von Maltitz sê Suid-Afrikaanse veeboere sukkel reeds jare lank onder moeilike ekonomiese omstandighede om hul ondernemings winsgewend te bedryf.

Die forum sê die bek-en-klouseer-uitbrake het die druk op die bedryf verder verhoog.

Die Rooivleisforum doen ‘n beroep op die minister van landbou, Willie Aucamp, om enige invoere van lewende diere en rooivleis uit die streek deeglik te oorweeg.

Die moontlike risiko van siekteverspreiding, streng biosekuriteitsvereistes en die invloed van invoere op plaaslike markpryse moet volgens die forum in ag geneem word.

Die forum het gesê handelsooreenkomste moet nie ten koste van Suid-Afrikaanse produsente se ekonomiese voortbestaan aangegaan word nie.

Die beskerming van plaaslike produsente se marktoegang en vermoë om volhoubaar te boer, is volgens die forum noodsaaklik om ‘n gesonde rooivleisbedryf in Suid-Afrika te verseker.