Die liefde vir diere het vir die 24-jarige Chrese Everton van Kroonstad in haar roeping ontwikkel. As veldbeampte by die plaaslike DBV staan sy op vir diere wat verwaarloos, mishandel of aan hulself oorgelaat is.

Dié gebore Kroonstadter het onlangs as veldbeampte gekwalifiseer en doen uitstekende werk.

Haar pad by die DBV het egter lank voor haar aanstelling as personeellid begin. Chrese het twee jaar lank in die DBV se komitee gedien. Die ervaring het haar laat besef dat sy ‘n groter rol in die beskerming en versorging van diere wil speel.

Sy het haar daarna by die personeel aangesluit en werk al een jaar en vier maande as veldbeampte.

“Ek geniet dit om met die diere te werk, hulle te help en te weet dat ek ‘n verskil kan maak,” sê sy.

Die grootste beloning vir Chrese is om te sien hoe ‘n dier wat swaargekry het, weer vertroue in mense kry.

“Die beste deel is om daardie hond of katjie te sien wat, ná alles wat met hom gebeur het, weer leer om mense te vertrou.”

Elke redding bring volgens haar ‘n herinnering aan waarom sy die werk gekies het.

LEES OOK: Love of animals keeps her fire lit

‘n Dier wat veilig is, ‘n beseerde dier wat herstel en selfs ‘n stertjie wat weer swaai, maak die moeilike dae die moeite werd.

“Wat my werk spesiaal maak, is dat ek elke dag die kans kry om ‘n verskil te maak in die lewe van ‘n dier.”

Chrese glo haar werk gaan oor meer as die uitvoering van haar pligte. Dit gaan daaroor om ‘n stem te wees vir diere wat nie self vir hulp kan vra nie.

“Dit is nie net ‘n werk vir my nie – dit is my passie en iets wat diep in my hart lê.”