Graan SA het ‘n interdikaansoek teen die JSE se besluit gebring om die huidige Meervoudige Verwysingspuntmodel (MRP) vir sojabone te staak en terug te keer na ‘n Enkelverwysingspuntmetodologie (SRP). Die JSE het besluit om die aansoek teen te staan.

Graan SA sê die verskil tussen die twee berekeningsmetodes beloop sowat R220 per ton in die vervoeraftrekking. Onder die MRP-metodologie beloop die gemiddelde vervoeraftrekking volgens die organisasie ongeveer R113 per ton, terwyl dit onder die enkelverwysingspuntstelsel tot sowat R333 per ton kan styg.

Graan SA bereken die verskil oor die betrokke sojaboonvolumes en silopunte op ongeveer R696 miljoen.

“Boere word gevra om ‘n stelsel te aanvaar wat, volgens ons berekeninge, beduidende koste tot die waardeketting toevoeg,” het dr Tobias Doyer, hoof uitvoerende beampte van Graan SA, gesê.

Die MRP-model neem volgens Graan SA die werklike ligging van graan, die beskikbaarheid daarvan en die ligging van verwerkingsaanlegte in ag. Die SRP-model gebruik een sentrale verwysingspunt om die differensiaal te bereken, selfs wanneer ‘n produsent se natuurlike mark of verwerker nader geleë is.

Dirk Strydom van Graan SA het gesê die MRP-model koppel beskikbare graan aan verwerkingsvraag deur die mees ekonomies doeltreffende roete te gebruik.

Graan SA het gesê vir produsente kan ‘n hoër differensiaal in die JSE-termynkontrak tot groter aftrekkings van die kontantprys lei. Verwerkers en vervaardigers kan met hoër insetkoste te doen kry.

Die organisasie het gesê die besluit om die MRP-model te verwerp word nie deur voldoende kwantitatiewe bewyse ondersteun nie. Graan SA meen die ooreengekome evalueringskriteria is nie voldoende aangespreek nie.