BETHLEHEM – Die Vrystaatse Departement van Landbou, Landelike Ontwikkeling en Omgewingsake het op Vrydag 17 Julie agt nuwe gevalle van bek-en-klouseer bevestig. Die totale aantal bevestigde gevalle in die provinsie het tot 687 gestyg.
Die jongste gevalle is in die Boshof-gebied (2) en Smithfield (6) bevestig.
Die departement het bevestig dat 181 gevalle afgehandel is nadat alle voorgeskrewe siektebeheermaatreëls nagekom is en kwarantyn op die betrokke eiendomme opgehef is.
Bek-en-klouseer is nou in 19 munisipaliteite in die Vrystaat bevestig. Kroonstad is die gebied wat die swaarste getref is, met 119 bevestigde gevalle. Daarna volg Heilbron (94), Frankfort (74), Bethlehem (67) en Sasolburg (64). Welkom, wat die Matjhabeng- en Nala-munisipaliteite insluit, het 43 bevestigde gevalle aangeteken.
Die departement het gesê sommige veeboere versuim om gevalle betyds aan te meld. Volgens die departement belemmer laat aanmelding die beheer van die uitbreking en verhoog dit die risiko dat die siekte verder kan versprei.
Amptenare het gesê alle vermoedelike gevalle moet onmiddellik aangemeld word, soos voorgeskryf in Regeringskoerant No. 54 969 (Regeringskennisgewing No. 7668), wat op 8 Julie ingevolge die Wet op Dieresiektes, 1984 (Wet 35 van 1984) gepubliseer is.
Versuim om vermoedelike gevalle aan te meld is ‘n oortreding van die wet en belemmer siektetoesig, entstofbeplanning en die doeltreffende toewysing van hulpbronne.
Veeboere is versoek om:
- vermoedelike gevalle onmiddellik aan te meld;
- besmette diere te isoleer;
- die beweging van gekloofde hoefdiere te beperk;
- voertuie, toerusting en skoeisel te ontsmet;
- rekords van vee-identifikasie en dierbewegings by te hou; en
- alle kwarantyn- en bewegingsbeperkings na te kom.
Diere mag slegs met skriftelike toestemming van die staatsveearts en die voorgeskrewe permitte vanaf gekwarantynde persele verskuif word.
Die departement het georganiseerde landbou, private veeartse, veilings, voerkrale en veeboere vir hul ondersteuning bedank.
