Die Hoërskool Voortrekker van Bethlehem het die afgelope naweek geskiedenis gemaak toe sy eerste netbalspan as die beste o.19-span in die Vrystaat gekroon is. Dit nadat Voortrekker die DSTV Vrystaat-netbalkampioenskappe wat gister in Kroonstad plaasgevind het, op ‘n indrukwekkende wyse gewen het.

Die span het deurgaans met vasberadenheid, dissipline en uitstekende spanwerk gespeel en teen elke teenstander hul stempel afgedruk. Voortrekker het die toernooi oorheers en vyf van sy ses wedstryde met oortuigende tellings gewen voordat die span in ‘n spannende eindstryd teen die Hoërskool Sentraal van Bloemfontein te staan gekom het.

Die kampioene het Hoopstad met 39-10 verslaan, Sentraal in die groepsfase met 24-19 geklop, Goudveld met 42-11 oorrompel en Trio met 43-12 gewen.  In die halfeindstryd het Voortrekker sy uitstekende vorm voortgesit en Witteberg met 38-18 geklop.  

Die eindstryd teen Sentraal het egter vir ‘n ware toets gesorg. In een van die mees opwindende wedstryde van die kampioenskap het die twee spanne doel vir doel meegeding voordat Voortrekker in die laaste oomblikke met 29-28 geseëvier het.

Die naelbyt-oorwinning het die span se karakter, veggees en vermoë om onder druk te presteer duidelik bewys.  Met die oorwinning het Voortrekker die goue medalje verower en die skool bo-aan die Vrystaatse netbalranglys geplaas.

Sentraal moes met die silwermedalje tevrede wees, terwyl Oranje die bronsmedalje ontvang het. Die Hoërskool Witteberg van Bethlehem het in die alghele vierde geëindig.

“Die besonderse prestasie is die beloning vir maande se harde werk deur spelers, afrigters en ondersteuners wat saam aan die span se sukses gebou het. Die spelers het nie net hul skool met trots verteenwoordig nie, maar ook hul name in die geskiedenisboeke van Voortrekker geskryf,” sê Lisa van Wyk die spanbestuurder van Voortrekker. 

Die fokus verskuif nou na die Suid-Afrikaanse kampioenskappe wat van 23 tot 25 Julie plaasvind, waar die Vrystaatse kampioene die geleentheid sal kry om hul talent op die nasionale verhoog te wys. Indien hul vertonings in die Vrystaatkampioenskappe enigiets is om na te gaan, sal Voortrekker met groot selfvertroue en hoë verwagtinge na die nasionale kampioenskappe vertrek.