‘n Aandpretloop op Woensdag 20 Mei by DF Akademie beloof om meer as net ‘n stap te wees — dit is ‘n gemeenskapsdaad van hoop, liefde en saamstaan.
Die skool se Verteenwoordigende Raad van Leerders se Tuinklub bied die eerste jaarlikse Lig Loop aan — ‘n informele aandpretloop van sowat 2,5 tot 2,8 km oor die volle terrein van DF Akademie in Bellville. Die geleentheid geskied onder die vaandel van die skool se 2026-tema: “Kies die Lig.”
Kies die Lig
“Die naam Lig Loop sê eintlik alles,” sê Lorinda Smit, een van die hooforganiseerders. “Ons stap vir lig in iemand se donker tyd — en ons kies om lig te wees vir mekaar as gemeenskap.”
Die stap begin om 18:00 en duur tot 21:00. Vir ‘n inskrywingsfooi van slegs R25 per persoon lei die roete deelnemers deur al die nuwe tuingebiede wat sedert April verlede jaar onder die sorg van die tuinklub ontwikkel is — insluitend die nuwe astro-arboretum by die hokkiebane, die tennistuine langs die tennisbane, en die verlengde kweekgebied van 25 meter.
Teen ‘n gesellige kuierpas neem die roete ongeveer 45 minute om te voltooi — perfek vir gesinne, oumas en oupas, en selfs die kleintjies.
Langs die pad wag tien stalletjies — een omtrent elke 250 meter — met heerlike eetgoed soos varsgebakte koek en kaneelrol (cinnabuns) van LiseBakes, spesialiteitskoffie van Die Koffieblik, biltong van Biltong Bites en gesonde drankies van Sip & Stap en Die Ligtuin. Die geleentheid eindig by ‘n groot kuiergebied met musiek en ‘n feestelike atmosfeer. Al die stalletjies word deur entrepreneurs binne die DF-familie teen huur van R300 elk bedryf.
LEES OOK: Plantwerksessie ‘n reuse sukses by DF
Registrasie geskied by aankoms. Vir diegene wat nie toegang tot die Karri-toepassing het nie, sal kaartgeriewe beskikbaar wees.
Stap vir Niël Zeeman
Die hart van hierdie geleentheid klop vir ‘n jong man met ‘n groot geveg voor hom: Niël Zeeman, alumnus van DF Akademie en lid van die klas van 2025 — dieselfde klas as Ruben van Rooyen.
In Januarie vanjaar is osteo-sarkoom in Niël se regterarm gediagnoseer. Hy ondergaan tans chemoterapie, met ‘n operasie en bestraling wat beplan word. Sonder ‘n siekefonds is die finansiële las vir sy gesin geweldig groot.
“Ons wou iets doen wat regtig ‘n verskil maak,” sê Smit. “Altesame 80% van alle inskrywingsgeld gaan direk na Niël. Met 2 000 tot 4 000 verwagte deelnemers hoop ons om naby aan R100 000 in te samel.”
‘n Back-a-Buddy-skakel sal per QR-kode by die aanvang van die geleentheid gedeel word, sodat almal — ook dié wat nie kan loop nie — steeds kan bydra.
Die keuse van begunstigdes vir toekomstige Lig Loop-geleenthede sal jaarliks geskied in samewerking met dr. Johann Riedemann van CancerCrayon en Cancercare, wat help om die mees behoeftige gevalle te identifiseer.
‘n Jaarlikse tradisie in wording
Die Lig Loop is nie net ‘n eenmalige gebeurtenis nie — dit is die begin van ‘n beweging. Die oorblywende 20% van die opbrengs gaan vir die RVR DF Tuinklub se terreinverbeteringswerk, insluitend plantdonasies aan gemeenskapskole soos die Laerskool Totius en die Hoërskool Delft.
LEES OOK: Skool se groentetuin strek helpende hand uit na bejaardes in gemeenskap
“Ons wil elke jaar iemand raaksien, elke jaar saamstaan, en elke jaar ons terrein mooier maak vir almal,” verduidelik Smit.
Skoolgemeenskappe in die omgewing word ook uitgenooi om deel te neem, met bemarkingsmateriaal wat via DF Akademie beskikbaar gestel word.
- Datum: Woensdag 20 Mei;
- Tyd: 18:00 – 21:00;
- Plek: DF Akademie, Bellville;
- Inskrywing: R25 per persoon (by aankoms).
Of jy ‘n fikse atleet is of iemand wat net ‘n gesellige aand wil geniet — Lig Loop is vir almal. “Kom kies die lig. Kom stap vir Niël,” nooi Smit.
You must be logged in to post a comment.