PRETORIA – Drie mense, insluitend twee senior polisiebeamptes, is in hegtenis geneem vir hul beweerde betrokkenheid by die onwettige handel in en besit van edelmetale.
Die nasionale polisie het bevestig dat die inhegtenisnemings die afgelope naweek (Vrydag 8 tot Sondag 10 Mei) plaasgevind het. Dit volg ná ’n intensiewe ondersoek deur Gauteng se teen-intelligensie-eenheid (GCI-OPS) na bewerings van korrupsie en onwettige transaksies. Die span het opgetree op grond van ‘n lasbrief.
Die drie verdagtes sal na verwagting Maandag 11 Mei voor die Kempton Park-landdroshof verskyn. Aanklagte kan die onwettige handel in edelmetale, regsverydeling, korrupsie en oortreding van wetgewing wat edelmetale in Suid-Afrika reguleer, insluit.
Die saak vorm deel van voortgesette pogings deur wetstoepassers om netwerke betrokke by die onwettige handel in edelmetale en korrupsie te ontmantel.
