Terwyl ‘n Casablanca-ma rou oor haar vyfjarige seun wat op Sondag 12 Julie verdrink het, eis die gemeenskap antwoorde oor veiligheidstekortkomings by die Rusthof-begraafplaas-uitbreiding.

Die Strand-polisie het aanvanklik ‘n geregtelike doodsondersoek geopen, maar ‘n woordvoerder bevestig dat die ondersoek nou as ‘n moordsaak voortgaan.

Dit kom nadat ‘n verdagte van Strand in verband met die verdrinking in hegtenis geneem is.

Avril Peters is in diep rou gedompel nadat haar seuntjie in ‘n poel water verdrink het.

Die poel het ontstaan in uitgrawings op ‘n ontwikkelingsterrein agter Bridgotte-straat ná swaar reënval.

Peters verduidelik dat haar seun die middag van die voorval buite hul huis in Nadia-straat gespeel het. “Ek het vir sy pa gesê: ‘Jong, die kind bly nou te lank weg’,” vertel Peters.

Sy pa het hom by die parkie gaan soek. ‘n Buurman het hom toe aanbeveel om by die ontwikkelingsterrein te gaan soek.

“Dis toe dat sy pa die blou jas wat hy aangehad het, uit die water sien steek,” sê Peters. “My man het hom toe uit die water gaan haal.”

Die seun is op die toneel deur nooddienste dood verklaar.

Terwyl die polisieondersoek voortduur, worstel die gemeenskap met onbeantwoorde vrae oor hoe die seun toegang tot die terrein kon kry.

‘n Gemeenskapsleier, Brent Louis, het die tragedie op die dag van die voorval op sosiale media aangekondig, wat skokgolwe deur die gemeenskap gestuur het.

Op Dinsdag 14 Julie het ander gemeenskapsleiers ‘n vergadering by die ontwikkelingsterrein gehou, waar hulle ernstige vrae oor die veiligheid van die terrein geopper het.

Hulle het spesifiek na die gebreekte palisadeheining verwys, wat volgens hulle kinders toegang tot die terrein gegee het.

“Hoe kan jy net veiligheidstou daar sit om kinders te keer?” vra die gemeenskapsleier Fransina Lukas.

Brendyn Alloys en Ronald Hendricks het ook die skare toegespreek en beklemtoon dat die kontrakteur van die ontwikkelingsterrein verantwoording moet doen oor die gebrek aan behoorlike veiligheidsmaatreëls.

Die gemeenskap het belowe om alle werk by die terrein te stuit totdat ‘n vergadering tussen die betrokke gemeenskapslede en die kontrakteur gereël word.

“Moet nooit lojaal bly aan ‘n maatskappy wat van jou en die gemeenskap neem en net krummels teruggee nie,” sê Lukas.

Daar is ook geëis dat die ­Wyk-100-raads- lid Sean Stacey en gemeenskapskakelbeampte (CLO) Evolino Simons verantwoordelik gehou moet word, omdat hulle glo nie die veiligheidstekortkominge voor die tragedie aangepak het nie.

Die gemeenskap beskuldig Simons verder daarvan dat sy die CLO was terwyl sy ‘n proporsionele-verteenwoordigings-raadslid vir die subraad 18 is.

Simons verwerp die bewerings en sê sy het in Desember 2025 as CLO bedank voordat sy as PR-raadslid ingesweer is.

Sy verduidelik dat die CLO-rol kommunikasie inhou, nie veiligheidsbestuur nie – dit is die kontrakteur se verantwoordelikheid. Sy het haar meegevoel met die familie uitgespreek.

Stacey het verlede Maandagaand (13 Julie) die seun se familie besoek om sy meegevoel te betuig.

Hy sê hy is nie bewus van enige gemeenskapslede wat van hom verantwoording eis nie, en dat geen inwoners voor die voorval veiligheidsbekommernisse by hom gerapporteer het nie.

“Sover ek weet, is dit ‘n moordondersoek, en die familie het nie die skuld op die kontrakteur, die Stad Kaapstad of op my gepak nie,” sê Stacey.

Hy het duidelikheid van Stadsbeamptes versoek oor waarom daar nie veilige omheining aangebring is nie.

Die Stad het bevestig dat hy bewus is van die voorval en dat dit tans ondersoek word, maar kon teen druktyd nie verdere besonderhede verskaf nie.

DistriksPos & Helderberg Gazette het navrae aan die kontrakteur gestuur, maar kon geen reaksie kry nie. Tegniese probleme is as rede verskaf.

Intussen het die verdagte op Vrydag 17 Julie in die Strand-landdroshof verskyn en die saak is tot Dinsdag 28 Julie uitgestel.

 Enigiemand met addisionele inligting wat die polisieondersoek kan help bevorder, word versoek om die Strand-polisiekantoor by 021 854 9115 te skakel.