Jaarlikse Interskolebyeenkoms. Laerskool Hartenbos maak hierdie naweek gereed om Hartenbos se sport- en kultuurtoneel te laat bruis. Laerskool Stellenbosch gaan die dorp besoek vir die jaarlikse interskolebyeenkoms.
Die twee skole sal meeding in uiteenlopende aktiwiteite. Dit sluit in skaak, hokkie, netbal, rugby, e-sport, algemene kennis, redenaars, tennis, gholf en landloop. Volgens die skoolbestuur heers daar groot opgewondenheid onder spelers, afrigters en ondersteuners, en die dorp word na verwagting in die kleure van blou en rooi gehul.
Saterdag se verrigtinge beloof om nie net sportief nie, maar ook feestelik te wees. Benewens die wedstryde sal toeskouers vermaak word met rasieleiers, kosstalletjies en ’n tag-rugbywedstryd waarin pa’s hul kragte meet. ’n Besonderse hoogtepunt is die aflewering van die wedstrydbal vir die laaste rugbywedstryd per helikopter – ’n tradisie wat die atmosfeer verder gaan verhoog.
Nog ’n trotse oomblik op die program is die Groot Brag, waar die o.13-spanne amptelik aan die skoolgemeenskap en ondersteuners voorgestel word. Hierdie seremonie beklemtoon die trots en erns waarmee die interskole aangebied word.
You must be logged in to post a comment.