Noordwes – Hoërskool Rustenburg het tydens sy Graad 12-prysuitdeling een van die mees gesogte akademiese eerbewyse van die jaar toegeken. Die Dux-toekenning vir die toppresteerder in Graad 12 is vanjaar aan Janel Heukelman oorhandig, ná ’n jaar van buitengewone akademiese prestasie en toewyding.
Janel het haar as een van die skool se mees uitsonderlike akademiese presteerders onderskei deur ’n indrukwekkende gemiddelde van 95,17% te behaal. Hierdie besondere prestasie het haar Erekleure besorg en haar status as een van die voorste presteerders in haar graad bevestig.
Haar merkwaardige akademiese rekord word verder beklemtoon deur die ontvangs van agt vaktoekennings in Afrikaans, Engels, Wiskunde, Fisiese Wetenskappe, Rekeningkunde, Lewenswetenskappe, Lewensoriëntering en Alpha Wiskunde.
Janel het ook uitstaande individuele vakprestasies gelewer, waaronder:
- Engels: 100,00%
- Alpha Wiskunde: 98,33%
- Rekeningkunde: 97,00%
- Wiskunde: 95,00%
- Lewenswetenskappe: 95,00%
- Fisiese Wetenskappe: 93,00%
Benewens haar akademiese sukses het Janel haar ook op kulturele en intellektuele vlak onderskei. Sy het die ATKV-redenaarskompetisie se semifinaal gehaal en ’n besonderse prestasie in die Afrikaanse Olimpiade behaal deur eerste in Noordwes en elfde nasionaal te eindig.
Janel se prestasies getuig van uitsonderlike intellektuele vermoë, deursettingsvermoë en selfdissipline. Haar sukses dien as inspirasie vir mede-leerders en bevestig die hoë akademiese standaarde waarvoor Hoërskool Rustenburg bekend is.
Die Hoërskool Rustenburg-gemeenskap gelukwens Janel met hierdie merkwaardige mylpaal en wens haar alle sukses toe met haar toekomstige studie- en loopbaanpad. Haar nalatenskap van uitnemendheid sal nog lank as voorbeeld dien vir toekomstige geslagte Rusties.
Foto verskaf
