Doom Gouws-rugbyweek. Hoërskool Ben Vorster, Groblersdal, is trots om aan te kondig dat Jivano Boois deel was van die Limpopo Blou Bulle o.16-span. Die Limpopo Blou Bulle o.16-span het aan die gesogte Doom Gouws-rugbyweek deelgeneem. Hierdie toernooi is van 29 Junie tot 3 Julie 2026 by Hoërskool Nylstroom aangebied. Van die land se beste jong rugbytalente het daar byeengekom.
Hierdie week in ‘n jaar bied spelers ’n unieke geleentheid om op ’n hoë vlak mee te ding. Hulle doen waardevolle ervaring op en toets hul vaardighede teen topkompetisie. Die Limpopo Blou Bulle het hul veldtog met groot vasberadenheid aangepak:
- Op dag een het hulle teen die Pumas te staan gekom en ná ’n sterk poging met 15–29 vasgeval.
- Dag twee het die span dapper teen die Luiperds geveg, maar met 08–36 verloor.
- Tydens die laaste dag het die Blou Bulle karakter en deursettingsvermoë getoon deur die Griffons met 19–12 te verslaan. So het hulle die week op ’n hoogtepunt afgesluit.
Jivano se insluiting in die Limpopo Blou Bulle-span en sy deelname aan hierdie prestigeryke rugbyweek is ’n bewys van sy toewyding, talent en harde werk. Hierdie ervaring dra nie net by tot sy ontwikkeling as rugbyspeler nie, maar skep ook geleenthede om op hoër vlakke raakgesien te word.
“Hoërskool Ben Vorster wens Jivano hartlik geluk met hierdie prestasie en sien met trots uit na die verdere groei van sy rugbyloopbaan.”
