Skenking maak verskil by huis vir kinders met serebrale gestremdhede

Te danke aan Nappy Run, ‘n geldinsamelingsprojek, kon ‘n vrag doeke en pakke poeierkos onlangs by die Helen Bishop-huis in Kimberley afgelewer word.

Tans woon 61 kinders met mediese toestande, wat wissel van serebrale gestremdheid tot spina bifida, in dié ortopediese tehuis, en bykans elkeen van hulle moet permanent doeke dra.

Nappy Run is ‘n jaarlikse veldtog en geldinsamelingsprojek van die Nasionale Raad vir en van Persone met Gestremdhede, waarby die Vereniging vir en van Persone met Gestremdhede in die Frances Baard-distrik (APD-FB) geaffilieer is.

In dié veldtog word bewusmaking geskep oor die kwessies waarmee kinders met gestremdhede te make het, en voorspraak en steunwerwing word gedoen terwyl geld ook ingesamel word om doeke vir dié kinders te koop.

‘n Doek is die sentrale simbool vir die veldtog.

So bied die nasionale raad ‘n pretdraf by die Johannesburgdieretuin aan waar die inskryfgeld ‘n pak doeke is.

“Alle kinders verdien liefde, lewensgehalte, die gevoel van behoort en om in die samelewing ingesluit te word.

“Ongelukkig is dit nie altyd die werklikheid vir kinders met gestremdhede nie”, sê Dorothy-Anne Howitson, sekretaresse en woordvoerder van APD-FB.

“Baie gestremdhede veroorsaak inkontinensie en kinders met gestremdhede het ‘n groter behoefte aan doeke en vir langer tydperke, en moet dikwels doeke tot in hul tiener- en volwasse jare gebruik.”

Met die samewerking van die Kimberley-Rotaryklub en Advance Transport, is die vrag doeke en pakke poeierkos by die tehuis in Kimberley afgelewer.

Namens die vereniging en belanghebbendes bedank Howitson almal wat ‘n bydrae gelewer het.