Elmarie Booyang (33) is een van tien jong entrepreneurs uit die Springbok-omgewing wat onlangs ‘n digitale opleidingswerkswinkel voltooi het as deel van Jeugmaand. Die program het ‘n betekenisvolle impak op hoe sy haar besigheid benader en laat groei, en het haar met praktiese digitale hulpmiddels en ‘n duideliker strategie toegerus om kliënte in ‘n toenemend mededingende digitale landskap te bereik en te betrek.
“Ek het geweet ek wil deel wees van hierdie program, want ek glo elke geleentheid om te leer, is ‘n geleentheid om te groei, persoonlik en in besigheid,” sê Booyang, wat ‘n volwaardige gebeurtenisbesigheid in Concordia bestuur wat in dekor, fotografie, videografie, dronedienste en inhoudskepping spesialiseer.
Die digitale bemarkingsvaardigheids-opleidingswerkswinkel, wat oor vyf dae gestrek het, is deur Kangnas-windkragaanleg befonds, en het praktiese opleiding in fotografie, videografie, kunsmatige intelligensie (KI)-instrumente en inhoudskepping gebied. Vir iemand wat reeds in die kreatiewe bedryf werk, het die program nie net nuwe kennis gebied nie, maar ook ‘n nuwe perspektief op vaardighede wat sy al jare lank beoefen.
Belegging in toekoms
“Fotografie was beslis my gunsteling deel van die opleiding, want dit is iets waaroor ek passievol is. Al werk ek reeds in die bedryf, het ek nuwe tegnieke geleer wat sal help om die gehalte van my werk te verbeter,” sê sy.
Voor die werkswinkel het Booyang se maatskappy hoofsaaklik op Facebook, TikTok en persoonlike verwysings staatgemaak om nuwe kliënte te bereik. Die opleiding het haar ‘n duideliker begrip gegee hoe om strategiese, professionele inhoud te skep, KI-instrumente te gebruik om meer doeltreffend te werk, en die regte gehoor meer effektief te teiken.
“Hierdie opleiding het my selfs meer selfvertroue gegee in wat ek doen. Dit het my herinner dat daar altyd iets nuuts is om te leer, en dit het my praktiese vaardighede gegee wat ek onmiddellik kan toepas.”
Vir Elmarie strek die impak veel verder as haar besigheid. “Hierdie geleentheid het my geïnspireer om groter te droom en selfs meer te glo in wat ons besig is om op te bou. Dit is nie net ‘n belegging in my besigheid nie, maar in my toekoms, my familie, en die gemeenskap wat ons dien.”
Haar ambisie vir die volgende twee jaar is om haar besigheid te laat groei tot een van die voorste gebeurtenismaatskappye in Namakwaland, deur haar kliëntebasis uit te brei, dienste te verbreed, en voort te gaan om werk van hoë gehalte te lewer.
Deel van verbintenis
Die werkswinkel vorm deel van Kangnas-windkragaanleg se breër verbintenis tot jeugbemagtiging, vaardigheidsontwikkeling en plaaslike ekonomiese ontwikkeling. Dit is spesifiek ontwerp om ‘n leemte aan te spreek wat onder jong entrepreneurs in die omgewing geïdentifiseer is – beperkte toegang tot praktiese digitale bemarkingskennis op ‘n tydstip waar ‘n aanlyn teenwoordigheid noodsaaklik vir besigheidsgroei en langtermyn-volhoubaarheid geword het.
“Namate die besigheidsomgewing toenemend digitaal word, is dit ‘n strategiese belegging in die mededingendheid en veerkragtigheid van jeugbesighede in ons gemeenskap om jong entrepreneurs met hierdie vaardighede toe te rus,” sê Rouchet Daniels, ekonomiese ontwikkelingsbestuurder van Kangnas-windkragaanleg.
LEES OOK: New multipurpose school hall to benefit learners, educators and community
