PAROW – ’n 25-jarige man is tot ’n effektiewe 25 jaar gevangenisstraf gevonnis vir die moord op drie familielede by hulle Bishop Lavis-woning in Desember 2022.
Die Parow Streekshof het die vonnis aan Cevyn Kemp opgelê nadat hy skuldig gepleit het op al drie aanklagte van moord.
Die tragiese gebeurtenisse het op 14 Desember 2022 in Martin Lane, Bishop Lavis, ontvou toe Kemp sy broer Peter gekonfronteer het oor sy mislukking in sy skooleksamens.
Volgens Kemp se getuienis het hy sy broer in sy kamer gevind waar hy dwelms gerook het. Gedurende die daaropvolgende argument het Peter hom na bewering geslaan en aangerand. In reaksie het Kemp ’n baksteen wat as ’n deurstopper gebruik is, opgetel en sy broer herhaaldelik op die kop geslaan, wat tot noodlottige kopbeserings gelei het.
Toe hulle ma, Elmoline Kemp, van die werk af tuis kom en navraag gedoen het oor waar Peter is, het Kemp aanvanklik vir haar gesê dat sy broer die huis verlaat het. Sy het egter onrustig geword en vir Peter gaan soek, waarna sy op sy lewelose liggaam in sy kamer afgekom het. Kemp het paniekbevange geraak en sy ma met dieselfde baksteen aangeval.
Die derde slagoffer, sy tannie Shireen Isaacs, het by die huis aangekom op soek na albei oorlede familielede. Nadat Kemp vir haar gesê het hulle het bure gaan besoek, het Shireen onsuksesvol in die buurt na hulle gesoek. Toe sy terugkeer na die Kemp-woning het sy die huis deursoek en op lmoline en Peter se lyke afgekom. Weer het Kemp dieselfde baksteen gebruik en haar noodlottig aangeval.
Die dag na die moorde het Kemp ’n vriend besoek en beken dat “iets gebeur het” met sy familielede. Die vriend en haar pa het hom terug huis toe vergesel, waar hulle die drie lyke in die agterplaas ontdek het.
Die polisie is verwittig en Kemp is gearresteer en van moord aangekla.
Tydens ’n sielkundige evaluering het Kemp aanvanklik ’n valse weergawe verskaf waarin hy beweer het dat hy iemand gesien het wat die lyke by die agterdeur sien uitsleep het, waarna hy by die voordeur uit gevlug het.
Ondersoekbeamptes het egter uitgewys dat die voordeur gesluit was, wat sy storie onmoontlik gemaak het. Toe hy met hierdie teenstrydighede gekonfronteer is en die geleentheid gegee is om die waarheid te vertel, het Kemp gebieg.
Streekshof-aanklaer Earl Edward Koopman het die teenstrydighe in Kemp se aanvanklike weergawe beklemtoon en lewenslange gevangenisstraf versoek. Die hof het egter substansiële en dwingende omstandighede gevind om van die voorgeskrewe minimum vonnis af te wyk.
Hierdie versagtende faktore het Kemp se onmiddellike bereidwilligheid om skuldig te pleit op sy eerste hofverskyning, sy uitdrukking van berou, sy ouderdom, en sy persoonlike omstandighede ingesluit.
Die hof het Kemp tot 25 jaar se direkte gevangenisstraf gevonnis vir elke aanklag van moord, met die vonnisse wat gelyktydig sal verloop.
