Glinsterende stokke, presiese stappe en onberispelike formasies! Atlete van plaaslike skole het by die streeks-trompoppiekompetisies gewys hulle is ‘n mag om mee rekening te hou.
Die skole het verlede Saterdag (13 Junie) aan die Boland-kampioene van kampioene by Somerset-Wes Primêre Skool en die Westelike Provinsie-kampioene van kampioene by die Wesbank-sportterrein in Malmesbury deelgeneem.
Tydens die WP-kompetisie was dit weer eens die Hoërskool Hottentots-Holland (HHH) wat die pou met die mooiste vere was toe hulle die eerste plek vir hul vormingsgroepe, vlagdissipline, klassieke stokdissipline, stafdissipline en sonder-pom-pom-dissipline behaal het.
In die kleindril-afdeling was HHH die algehele wenners met die eerste plek vir hul hoofleier, Drandra Hendricks, sub-leiers, die span-afdeling sowel as hul vertoning.
Hulle het ook puik gevaar in die grootdril-afdeling met die eerste plek vir hul hoofleier, Taya Pettinger, die span en spanvertoning, en die tweede plek vir hul sub-leiers.
Hierdie uitslae het daartoe gelei dat hulle as die WP-kampioene van kampioene gekroon is.
Intussen, met die praktiese tuisveldvoordeel, het albei Strand-skole – Dr. G.J. Joubert Primêr (Joubies) en Rusthof Sekondêr – die kom se vlag by die Boland-kompetisie gehys.
In die elite-laerskool-afdeling het die Joubies die tweede plek in die kampioene van kampioene behaal.
Dít was te danke aan hul prestasies in die afdelings sonder pom-poms, vlagdissipline, klassieke stokdissipline en stafdissipline, waar hulle tweede was.
In die kleindril-afdeling was hulle ook algeheel tweede, met hul hoofleier, Mekay Saffier, in die eerste plek, hul sub-leiers derde, die span tweede en spanvertoning ook tweede.
Die grootdril-afdeling het soortgelyke uitslae opgelewer, met die hoofleier Mekay weer in die eerste plek, sub-leiers derde, span tweede, vertoning tweede en algehele tweede.
In die ontwikkelingskool-afdeling – vir skole wat onlangs hul trompoppieprogram gestig het – het Rusthof Sekondêr die eerste plek behaal.
In die kleindril-afdeling was Rusthof eerste met hul span, vertoning, sonder pom-poms en groot vlaggroep.
Die grootdril-afdeling was nie anders nie, met Rusthof se hoofleier, Veronique Saffier, wat die eerste plek in beide die groot- en kleindril-afdeling behaal het en seker gemaak het dat haar jonger suster, Mekay, haar nie oortref nie. Die Saffier-susters het bewys dat Boland hulle nog vir baie jare sal onthou.
Met die streekskampioene van kampioene agter die rug, sien die Joubies en HHH nou uit na die nasionale kompetisie wat van Maandag 6 tot Saterdag 11 Julie in Roodepoort, Gauteng, aangebied word, terwyl Rusthof uitsien na deelname in die elite-hoërskool-afdeling volgende jaar.
