Met maande se oefening, perfekte uitvoering en nasionale ambisie het die Helderberg se trompoppies hul plek onder die land se elite in Roodepoort, Gauteng, bevestig.

Die Hoërskool Hottentots-Holland (HHH) en Dr. G.J. Joubert Primêre Skool (Joubies) se trompoppies het van Maandag 6 tot Saterdag 11 Julie aan die 2026- Suid-Afrikaanse Trompoppie-­en-Rasieleier-Vereniging (Samca) se nasionale kampioenskap deelgeneem.

Die Joubies het die kompetisie afgesluit as die vierde beste primêreskoolspan in die land, maar het net-net opeenvolgende podiumplekke misgeloop. Hulle was vanjaar sewende vir hul vlagdissipline en vyfde vir stafdissipline.

In die kleindril-afdeling het die Joubies se leier, Mekay Saffier, die derde plek behaal, met hul sub-leiers tweede, die span sewende en hul vertoning vyfde, wat hul algehele posisie in die kleindril op vyfde geplaas het.

Die meisies van Strand het ook ‘n podiumplasing in die grootdril-afdeling behaal, met die leier, Saffier, sesde en die span sowel as hul vertoning in die derde plek.

Dit volg nadat dié Strand-skool verlede jaar die derde plek by die kompetisie in Oudtshoorn behaal het (“Trompoppies haal topdrie in SA”, DistriksPos & Helderberg Gazette, 30 Julie 2025).

In die hoërskool-elite-liga het HHH se span van 41 lede die vierde plek in die grootdril-afde­ling behaal, met hul leier, Taya Pettinger, wat die derde plek in die grootdril- en derde plek in die kleindril-afdeling behaal het. Die Somerset-Wes-skool het derde uit 12 hoërskole geëindig en met bronsmedaljes vir die span se algehele posisie weggestap. Dit is die vierde agtereenvolgende keer dat HHH die derde beste hoërskool-trompoppiespan in die land is nadat hulle verlede jaar bronsmedaljes in Oudts­hoorn ontvang het (“Third time’s a charm for HHH”, DistriksPos & Helderberg Gazette, 6 Augustus 2025).

Met bronsmedaljes vir HHH en sterk individuele prestasies vir die Joubies het die Helderberg bewys die streek se trompoppie­talent swig nie onder nasionale druk nie.