Altesaam 28 vermeende seerowers het ontsnap nadat hulle in hegtenis geneem is tydens die bevryding van ’n gekaapte olietenkskip. Daar is vermoede dat polisielede moontlik met die ontsnapping gehelp het, het vier veiligheidsbronne Sondag aan AFP gesê.
Somaliese seerowery het sedert April weer toegeneem, met minstens 15 aanvalle vanjaar – die hoogste getal sedert 2013, volgens die VN se Internasionale Maritieme Organisasie.
Die olietenkskip Sibu 1, ook bekend as Seamull, is Vrydag bevry nadat die maritieme polisie dit onderskep het. Altesaam 41 vermeende seerowers is in hegtenis geneem en na die hawedorp Garacad geneem.
Die bevryding is as ’n oorwinning vir die owerhede in die semi-outonome staat Puntland beskou. Hulle word egter gekritiseer omdat hulle nie genoeg teen seerowery optree nie, terwyl die seerowers na bewering deur plaaslike gemeenskappe beskerm word.
Maar die gebeure daarna kan tot verdere kritiek lei: 28 van die vermeende seerowers het Vrydagaand ontsnap terwyl hulle van Garacad na die staatshoofstad, Garowe, vervoer is.
Ongewone roetine
Die vier plaaslike veiligheidsbronne wat AFP ondervra het, sê dit is ongewoon om verdagtes snags oor provinsiegrense te vervoer.
Die vragmotor waarin hulle vervoer is, het onderweg ’n pap band gekry. Die verdagtes het toe ontdek dat die deur nie gesluit was nie en het ontsnap, volgens die bronne.
Die polisie kon slegs 13 van die groep weer in hegtenis neem. Een van hulle is noodlottig deur geweervuur gewond.
“In Puntland vervoer ons nie verdagtes snags oor verskeie provinsies nie. Later tydens die rit het die seerowers uit die voertuig ontsnap omdat die deur se slot ontbreek het. Ek hoef niks verder te sê nie. Dit is voor die hand liggend,” het een bron gesê.
’n Ander bron het beweer die verdagtes se hande en voete was tydens hul aanvanklike inhegtenisneming vasgebind, maar dat die boeie verwyder is voordat hulle vervoer is.
Die broer van een van die verdagtes het aan AFP bevestig dat hy ontsnap het en “veilig” is.
Korrupte polisielede
“Daar moes mense binne die gewapende veiligheidsmag gewees het wat by die ontsnapping betrokke was,” het een van die vier bronne gesê.
“Die korrupte polisielede wat by die ontsnapping betrokke was, is nie beter as die seerowers wat op die vlug is nie,” het ’n ander bron gesê.
Somalië is saam met Suid-Soedan die laagste op Transparency International se korrupsiepersepsie-indeks.
Die Seamull-tenkskip is deur die Verenigde State gesanksioneer as deel van Iran se sogenaamde “skaduvloot”, wat daarvan beskuldig word dat dit Iraanse olie in die geheim uitvoer. Seerowers het die skip op 20 Augustus voor die kus van Jemen gekaap en dit na Somaliese waters geneem.