Vandag in die nuus

Hier is die hoofnuus wat vandag, 21 September, gebeur het. Dié artikel bevat die belangrikste nuus wat plaaslik, in die sportwêreld en oorsee plaasgevind het.

Plaaslik

• AfriForum gaan na verwagting Julius Malema en Fikile Mbalula privaat vervolg nadat hulle die Oos-Kaapse skoolhoof Jaco Pieterse daarvan beskuldig het dat hy verkragting gepleeg het, sonder dat daar volgens die organisasie enige bewyse vir die bewerings was.
• Die departement van basiese onderwys het gesê die Grondslagfase Nasionale Katalogus is gereed vir implementering ondanks tekortkominge wat in die verkrygingsproses geïdentifiseer is, maar minister Siviwe Gwarube het beklemtoon dat die katalogus eers op ’n regmatige wyse reggestel moet word voordat die leermateriaal aan provinsies versprei kan word.
• Die lyk van ’n vrou, vermoedelik in haar 20’s, is toegedraai in ’n duvet by die Morokadam in Soweto gevind, enkele dae nadat die liggame van 9 vroue sedert Julie regoor Ekurhuleni ontdek is.
• Die polisie het gesê hulle kan nog nie bevestig of ’n reeksmoordenaar in Gauteng aktief is nie, terwyl ondersoeke na die dood van 9 vroue in Ekurhuleni intussen uitgebrei is, met Tebello Mosikili, adjunkpolisiekommissaris vir sigbare polisiëring, wat bevestig het dat ’n 10de slagoffer nou by die breër ondersoek ingesluit is.
• Dis amptelik! Die skuif van die skrumskakel Haashim Pead van die Lions na die Stormers is amptelik bevestig, met die Johannesburgse franchise wat die skrumskakel alles van die beste toewens vir die volgende hoofstuk van sy loopbaan.

• Bok-breier Rassie Erasmus sal môre sy span aankondig wat Sondagoggend om 11:45 (SA tyd) teen Australië speel.
• Volgens Thami Ntuli, premier van KZN, word die provinsie met ’n toenemende aantal vermeende reeksverkragters gekonfronteer: ‘Dit is betreurenswaardig dat ons verneem het daar is ’n aantal reeksverkragters in die provinsie KwaZulu-Natal.’
• Die Arbeidshof het gelas dat Sibongiseni Thotsejane R2,9 miljoen skadevergoeding moet betaal nadat bevind is dat sy oor vorige afdankings gelieg het om die pos van hoofinligtingsbeampte by die V&A Waterfront in Kaapstad te bekom.
• ’n 36-jarige man wat Sondag in Ncotshane, Nongoma, in hegtenis geneem is, sal na verwagting vandag in die hof verskyn op aanklagte dat hy sedert 2010 glo 14 vroue in KZN en Gauteng verkrag het nadat hy vroeër vir soortgelyke misdade gearresteer en op borgtog vrygelaat is.
• Barbara Creecy, minister van vervoer, het ’n ondersoek gelas na die maatskappy wat met die Zimbabwiese sakeman Lawrence Mudzinganyama verbind word, nadat ’n video opgeduik het waarin hy vroue by ’n restaurant in Sandton glo verbaal aanrand.
• Zimbabwiese sakeman Lawrence Mudzinganyama, wat glo gedreig het om ’n groep vroue by ’n restaurant in Sandton dood te maak, het homself aan die polisie oorgegee en staan nou tereg op ’n aanklag van intimidasie.
• Andy Mothibi, nasionale direkteur van openbare vervolgings, het leefstyloudits vir ondersoekers van die ondersoekdirektoraat teen korrupsie en senior NVG-amptenare gelas te midde van toenemende kommer oor beweerde wanpraktyke.

• Joe ‘Ferrari’ Sibanyoni, sakeman en taxibaas, sal na verwagting vandag weer voor die Madlanga-kommissie verskyn, waar hy verder ondervra sal word oor die taxibedryf en sy beweerde bande met die sogenaamde ‘Groot 5’-kartel.
• Die 3 verdagtes, ’n man en 2 vroue wat die naweek deur die Gauteng se moord-en-roofeenheid in verband met die moord op ’n vrou wie se lyk in Dawn Park gevind is, in hegtenis geneem is, sal na verwagting vandag in die Boksburg-landdroshof verskyn.
• Die gewilde Kaapstad-DJ Ready D, oftewel Deon Daniels, het sy kortstondige politieke loopbaan beëindig nadat hy onder die vaandel van die People’s Movement for Change tevergeefs probeer het om burgemeester van Kaapstad te word, terwyl die party nog nie daarin geslaag het om verteenwoordiging in die stadsraad te verkry nie.

Oorsee

• Pole wil hê dat sowat 15 000 Amerikaanse troepe op sy grondgebied ontplooi moet word, het die land se adjunkminister van verdediging gesê, terwyl Rusland se oorlog in die buurland Oekraïne sy vyfde winter binnegaan.
• Die Verenigde Rusland-party van Wladimir Poetin het volgens voorlopige uitslae 355 van die 450 setels in Rusland se laerhuis, die doema, gewen en daarmee sy grootste parlementêre oorwinning nóg behaal.
• Die Kremlin sê die oorweldigende oorwinning van Wladimir Poetin se Verenigde Rusland-party in die parlementêre verkiesing toon dat die meerderheid Russe steeds die veteraanleier steun, ondanks kritiek dat die stemproses streng beheer is en partye wat die oorlog in Oekraïne teenstaan, uitgesluit is.
• Vyf lande, waaronder die Verenigde Koninkryk, Kanada en Australië, het Rusland se sogenaamde ‘skynverkiesing’ in besette dele van Oekraïne veroordeel.
• Motorwerkers regoor Duitsland het landwye betogings gehou en die regering asook motorvervaardigers versoek om dringend in te gryp om werksgeleenthede en fabrieke te beskerm te midde van ’n groot krisis in die motorbedryf.
• Delcy Rodríguez, Venezuela se tussentydse leier, het aangekondig dat sy in die VSA aangekom het om die Verenigde Nasies se Algemene Vergadering by te woon.

• Wolodimir Zelenski, president van Oekraïne, sal Dinsdag in New York met Donald Trump, president van die VSA, vergader terwyl albei leiers die Verenigde Nasies se Algemene Vergadering bywoon.
• Die Spaanse Sokkerfederasie het aangekondig dat Luis de la Fuente, die afrigter wat Spanje na die Wêreldbekertitel gelei het, ’n nuwe kontrak onderteken het wat hom tot 2032 in die pos sal hou.
• CNN, MS NOW en Politico gaan die administrasie van Donald Trump dagvaar nadat hulle toegang tot die Wit Huis geweier is, het die nuusorganisasies in ’n gesamentlike verklaring gesê.
• Die VSA het geweier om visums aan die kommunikasiespan van Masoud Pezeshkian, president van Iran, uit te reik, wat beteken hulle sal nie vandeesweek sy besoek aan die VN se Algemene Vergadering kan bywoon nie, het Iran se staatsmedia berig.
• ’n Venezolaanse burger is deur ’n Amerikaanse immigrasiebeampte geskiet en gewond, terwyl owerhede in Texas ’n deeglike ondersoek na die voorval geëis het.
• 5 voormalige senior Suid-Koreaanse militêre offisiere is tot tronkstraf van tot 18 jaar gevonnis vir hul rolle in die land se kortstondige instelling van krygswet in 2024, nadat oudpresident Yoon Suk Yeol destyds spesiale magte en helikopters na die parlement ontplooi het in ’n mislukte poging om wetgewers te keer om die besluit te verwerp.
• Minstens 12 mense is dood en tientalle beseer in gevegte in die weste van Ethiopië naby die grens met Suid-Soedan, terwyl die onrus die Gambella-streek, waar meer as 400 000 vlugtelinge woon, verder ontwrig het.

• Xi Jinping, China se president, sal van 23 tot 25 September die VSA besoek vir samesprekings met Donald Trump, het Beijing bevestig.
• 3 Suid-Koreaanse militêre offisiere is beseer tydens ’n ontploffing gedurende ’n operasie naby die grens met Noord-Korea.
• Die VSA het ingevolge geheime ooreenkomste met 35 lande meer as 25 000 buitelanders gedeporteer na lande waarmee hulle geen bande het nie, volgens ’n ondersoek wat gepubliseer is.
• Die model Presley Gerber, seun van Cindy Crawford, is op 27-jarige ouderdom oorlede nadat hy Sondag by ’n rehabilitasiesentrum in Los Angeles County gesterf het, maar die oorsaak van sy dood nog nie bekend gemaak is nie.