’n Besluit deur die Amerikaanse president, Donald Trump, om ’n nuwe pakket sanksies teen Rusland op te skort, is ’n “geskiedkundige oomblik”, het ’n Russiese presidensiële gesant Saterdag gesê.
Trump het Vrydag ’n uitvoerende bevel onderteken wat omvattende Amerikaanse sanksies en tariewe wat op Rusland se energie-inkomste gemik was, opskort. Dit sou twee dae later in werking tree.
Die besluit kom te midde van ’n botsing met die Oekraïense president, Wolodimir Zelenski, wat bespiegelinge laat ontstaan het dat die Amerikaanse leier hom toenemend aan Moskou se kant skaar. Dit is byna vyf jaar sedert Rusland sy offensief teen Oekraïne begin het waarin honderde duisende mense dood is en miljoene sedertdien ontwortel is.
“Die Trump-administrasie se opskorting van die Graham-wet is ’n belangrike en werklik historiese oomblik,” het Kirill Dmitriev, ’n gesant van die Russiese president, Wladimir Poetin, op sosiale media gesê.
Die Kremlin en Poetin het nog nie op die besluit gereageer nie. Poetin het Vrydag in militêre uniform verskyn en gesê Moskou beoog om die res van Oekraïne in te neem. Die opskorting van die sanksies is ’n groot diplomatieke oorwinning vir Rusland.
Die Lindsey Graham-wet, vernoem na die voormalige Amerikaanse senator wat die wetsontwerp voorgelê het, was gemik op Rusland se energie- en verdedigingsektore, asook Poetin en ander senior amptenare.
Dmitriev het gesê die wet sou “ernstige skade, in die eerste plek aan die Amerikaanse ekonomie en wêreldmarkte”, berokken het.
Westerse lande het Rusland aan omvangryke sanksies onderwerp nadat dié land in 2022 sy oorlog teen Oekraïne begin het.