Die Lions het Woensdagmiddag in ’n mediaverklaring bevestig dat die slot Hyron Andrews weens ’n skeur in die binnewand van sy hoofslagaar dood is.
Andrews is verlede Vrydag in sy hotelkamer aangetref waar die span by die Sainte-Marie-de-Ré in Frankryk tuisgegaan het.
“Die Lions Rugbyunie bevestig namens die Andrews-familie die lykskouingsverslag het aangedui Hyron se dood is deur ’n aorta-disseksie veroorsaak. Die disseksie het waarskynlik by ’n aorta-aneurisme ontstaan,” lui die verklaring.
Volgens die Franse owerhede, wat die lykskouing uitgevoer het en steeds in beheer van Andrews se oorskot is, was die oorsaak van sy dood “ ’n skeur in die aorta (weens natuurlike oorsake), wat tot ’n aansienlike ophoping van bloed in die bloedvatwand gelei het”.
Die familie het gevra hul privaatheid moet gerespekteer word en hulle moet tyd en ruimte gegun word terwyl hulle deur dié moeilike tyd gaan en die proses begin om Andrews se oorskot na Suid-Afrika terug te bring.
“ ’n Tydlyn vir die terugkeer van Hyron se oorskot na Suid-Afrika is nog nie bepaal nie. Verdere inligting sal in oorleg met die familie bekend gemaak word sodra dit beskikbaar is,“” lui die verklaring.
’n Minuut stilte is voor die afskop gehandhaaf, en die hartseer kon duidelik op die gesigte van sy spanmaats gesien word, met sommige wat ’n traan gestort het. Verskeie ander spanne wat die naweek gespeel het, het ook ’n minuut stilte voor hul wedstryde gehad.
Jowena Andrews, Hyron se tannie, het aan Paarl Post vertel sy skielike dood het hul familie erg geruk.
“Ons harte is gebreek, want Hyron was ons joy and pride gewees. En sy goal was eintlik om ’n Springbok te word. Hy het ’n baie bright future gehad. Hyron was baie doelgerig en was ’n baie humble mens – en sweet. Ja, en hy was ’n baie goeie pa en ’n baie goeie man vir sy vrou,” vertel Jowena.
“Sy dood is ’n groot skok, want Hyron was ’n baie gesonde mens. Hy was aktief. Ons het dit nie van hom verwag nie. Sy vrou se hart is gebreek met hul twee kleintjies. Haar ma het Saterdag uit Amerika hier aangekom. Sy vrou het ook vertel hy was fine en normal voordat hy weg is. Hyron het baie daarvan gehou om tyd saam met sy familie deur te bring.”
Maighlin Andrews het intussen ook ’n hartroerende huldeblyk aan haar man geskryf.
“Ek is nie seker of daar ooit genoeg woorde sal wees om te beskryf hoeveel jy vir my, ons seuns en jou familie, vriende en spanmaats oor die wêreld heen beteken nie. Jy was die allerbeste pa en hulle was jou alles. Ek weet dat ons gesin jou grootste trots was. Ek is so ongelooflik dankbaar vir die tyd wat ons saam met jou kon deurbring, hoewel dit seermaak dat ons tyd saam kortgeknip is. Ons het soveel planne gehad, soveel lewe wat nog voorlê en dinge om te ervaar. Dit voel onwerklik dat ons pas nog in die swembad geswem en vir mekaar gesê het ‘sien jou gou weer’ toe jy lughawe toe is.”
Die paartjie het in 2016 in Durban ontmoet toe Hyron vir die Haaie uitgedraf het en Maighlin ’n uitruilstudent uit Amerika aan die Universiteit van KwaZulu-Natal was. Hulle is in 2022 getroud en het twee seuntjies, Hendrix en Emerson, verwelkom.
Sedert die aankondiging van sy dood het medelye uit verskeie oorde van oor die wêreld heen ingestroom.
Kenneth Uren, hoof van die Laerskool Paulus Joubert, het ook aan die ontslape rugbyspeler hulde gebring. Hyron het sy laerskoolloopbaan in 2008 aan Paulus Joubert voltooi.
“Sy heengaan is ’n groot verlies – nie net vir sy familie en geliefdes nie, maar ook vir die rugbygemeenskap en almal wat die voorreg gehad het om hom te ken,” sê Uren.
Die Hoërskool Garsfontein, waar Hyron in 2013 gematrikuleer het, het ook sy innige simpatie gedeel.
Hyron het in sy jonger dae ook vir Young Standards RFC in die Paarl uitgedraf.
Kevin Benjamin, die president van dié rugbyklub, sê: “Hyron het Young Standards as ’n junior verteenwoordig – ’n span wat deur sy pa, Martin van Zitters, afgerig is. Die Van Zitters-familie is legendaries in die Standards-familie. Hyron was ’n rolmodel vir so baie huidige en oud-Standards-spelers en hulle het na hom opgekyk. Young Standards RFC betuig sy innige meegevoel aan Hyron se uitgebreide familie en vriende en verseker dat sy verlies ook Young Standards RFC se verlies is. Rus sag, ou grote.”
Beide die Leeus en Haaie het eer aan Hyron gebring en hom vir sy bydrae tot rugby bedank. Die Sale Sharks, vir wie hy in Engeland uitgedraf het, sê hulle is verpletter deur sy dood.
“Hyron was ’n baie geliefde lid van die groep, en almal by die klub verenig in hul boodskap van liefde, gedagtes en innige medelye aan sy vrou, Maighlin, hul pragtige seuns, die res van sy familie en vriende, sowel as almal by Lions Rugby.”
Hyron se ma, Colette Andrews, is einde 2020 weens Covid-19 oorlede.
“Ek bid dat jy saggies heengegaan het, geweet het hoe ongelooflik lief ons vir jou was en jou laaste gedagtes by jou gesin was. Ek bid dat jy altyd oor ons sal waak en ons sal beskerm. Dit bied my troos om te weet dat jy in die hemel herenig is met jou pragtige ma, asook met Ouma en Oupa,” skryf Maighlin.