Die Lions het hul Verenigde Rugbykampioenskap-veldtog uitstekend begin met twee agtereenvolgende oorwinnings om derde op die punteleer te sit, maar afrigter Ivan van Rooyen weet hul komende derby teen die Bulle sal sy span opnuut toets.
Hoewel die Lions die voordeel van twee tuiswedstryde agtereenvolgens gehad het, reis hulle nou Pretoria toe. Ondanks die kort reis weet die Lions die Bulle sal vasberade wees ná hul naelskraapse nederlaag teen Munster.
Van Rooyen weet presies wat sy span Saterdag op Loftus Versfeld te wagte kan wees.
“Dit is ’n tipiese derby, so ons kan ’n groot stryd op die vaste fasette en geweldige fisieke spel verwag,” het hy ná Saterdag se 35-19-oorwinning oor die Ospreys aan verslaggewers gesê.
Hoewel die Lions gemaklik teen die Walliese span gewen het, was dit hul vertoning in die tweede helfte wat die deurslag gegee het nadat hulle rustyd met 12-10 agter was.
Van Rooyen het erken dat só ’n vertoning nie teen die Bulle goed genoeg sal wees nie.
“Die Bulle het gewys hulle wil ’n bietjie meer speel, wat hulle gevaarlik maak omdat dit ook geleenthede skep,” het Van Rooyen gesê.
“Ons het ’n bietjie na die Bulle gekyk, maar vandag se vertoning sal nie volgende week teen die Bulle goed genoeg wees nie.”
“Verlede jaar, toe ons daar teen hulle gespeel het, was hulle in ’n oorgangsfase. Ek dink dit sal vanjaar baie anders wees. Hoewel hulle terugreis, is hul groepdiepte goed genoeg om dit te hanteer.
“Hulle het werklik baie spoed op die buitekante, asook ’n sterk pak voorspelers met baie dryfkrag voorlangs.
“Ek dink dit sal ’n heel ander uitdaging wees. Daar is een of twee dinge wat ons daaruit kan neem, maar ons weet dit is ’n nuwe week, ’n nuwe geleentheid en ’n ander wedstryd.”
Saterdag se wedstryd begin om 13:30 op Loftus Versfeld, Pretoria.