’n Speler van die Lions is Vrydag dood in sy hotel aangetref, kort voordat die span se Kampioenebeker-wedstryd teen La Rochelle sou plaasvind.
Daar word vermoed dat hy aan ’n hartstilstand gesterf het.
Die speler, wat luidens berigte in sy dertigs was, is volgens die Franse uitsaaier ICI La Rochelle bewusteloos in ’n stort by die Hôtel Atalante – Relais Thalasso op Île de Ré aangetref. Nooddienste het kort ná 10:20 Vrydagoggend opgedaag, maar kon hom nie bybring nie en hy is ná ’n vermoedelike hartstilstand op die toneel dood verklaar.
Volgens die Irish Examiner sal organiseerders van die Kampioenebeker na verwagting die uitstel van Saterdag se openingswedstryd tussen La Rochelle en die Lions bevestig, terwyl die Johannesburgse franchise ’n tragedie verwerk wat geen span ooit behoort te ervaar nie.
Die Lions het die nuus Vrydagmiddag aan die media bevestig.
“Dit is met diepe hartseer dat ons meedeel dat ons ontstellende nuus uit Frankryk ontvang het, waar die 10bet Lions tans voorberei vir hul openingswedstryd in die Investec Kampioenebeker.
“Die Lions Rugby Company is besig om ’n amptelike verklaring voor te berei, wat binnekort uitgereik sal word.”
Die speler, wie se naam nog nie bekend gemaak is nie, is bewusteloos in die stort aangetref. Ondanks pogings van nooddienspersoneel om hom by te bring, kon sy lewe nie gered word nie.
- Hierdie storie is nog besig om te ontvou en meer inligting sal met die publiek gedeel word soos dit bekendgemaak word.