Pres. Cyril Ramaphosa het die skorsing van genl. Fannie Masemola, nasionale polisiekommissaris, beëindig. Masemola hervat sy volle pligte op Maandag, 19 Oktober, nadat strafregtelike aanklagte teen hom teruggetrek is.
Die Presidensie het in ’n verklaring bevestig dat Masemola se skorsing, wat in April vanjaar ingestel is nadat hy in die Pretoriase landdroshof verskyn het, opgehef is.
Masemola het vier aanklagte in die gesig gestaar weens beweerde oortredings van die Wet op Openbare Finansiële Bestuur (PFMA) in verband met ’n multimiljoenrand-SAPD-gesondheidstender wat aan Medicare24 toegeken is.
Die nasionale direkteur van openbare vervolgings het op 15 September opdrag gegee dat die aanklagte teruggetrek word. Die hof het dit op 22 September amptelik teruggetrek.
Tydens Masemola se afwesigheid het lt.genl. Puleng Dimpane as waarnemende nasionale polisiekommissaris opgetree. Ramaphosa het Dimpane bedank vir haar diens en leierskap gedurende dié tydperk.
Cameron verwelkom terugkeer, maar eis aanspreeklikheid
Ian Cameron, DA-LP en voorsitter van die parlementêre portefeuljekomitee oor polisie, het Masemola se terugkeer verwelkom, maar beklemtoon dat ernstige uitdagings steeds op die polisie wag.
“Hy hervat sy verantwoordelikhede op ’n kritieke tydstip, terwyl die polisiediens steeds met groot uitdagings worstel,” het hy gesê. “Ek sien uit na voortgesette gesprekke met hom oor die versterking van aanspreeklikheid, die verbetering van operasionele doeltreffendheid en die aanpak van probleme waarmee speurders, forensiese dienste en polisielede op die voorgrond te kampe het.”
Cameron het egter ook sy kommer uitgespreek oor die optrede van die ondersoekdirektoraat teen korrupsie (Idac) in die saak.
“Die bewerings dat Masemola kwaadwillig geteiken is, veral in die lig van die getuienis wat voor die Madlanga-kommissie gelewer is en die daaropvolgende terugtrekking van die aanklagte, laat ernstige vrae ontstaan wat nie bloot geïgnoreer kan word nie.”
“Enige misbruik van ondersoek- of vervolgingsmagte moet behoorlik ondersoek word, met gevolge indien oortredings bewys word.”
Cameron het ook erkenning gegee aan Dimpane se diens as waarnemende nasionale kommissaris en gesê sy moes onder geweldige druk en moeilike omstandighede leiding gee gedurende een van die mees uitdagende tydperke in die SAPD se onlangse geskiedenis.