’n Vloedskadeherstelprojek van R73,6 miljoen van die Wes-Kaapse regering toon goeie vordering op 10 km van die Sewe Passe-pad naby George, met voltooiing wat vir Maart 2027 beoog word.
Die provinsiale minister van infrastruktuur, Tertuis Simmers, het gesê die projek, wat ook distrikspaaie wes van George en ’n pad by Wittedrif naby Plettenbergbaai insluit, lewer voordele wat verder strek as net infrastruktuur.
Brûe en verhoogde paaie in die distrik
Een beskadigde laagwaterbrug sal op elk van die distrikspaaie DR1602, DR1633 en DR1639 in die landbougebiede wes van George en noord van Groot-Brakrivier vervang word.
Die laagwaterbrug op DR1602 sal met ’n brug vervang word sodra omgewingsmagtiging verkry is. Die pad se uitleg sal ook vir groter veiligheid verbeter word. By Wittedrif tussen Plettenbergbaai en Keurboomstrand sal ’n beskadigde laagwaterbrug op DR1791 vervang word, terwyl ’n 150 m-gedeelte van die pad met sowat een meter verhoog sal word om by die nuwe struktuur aan te sluit.
Werkgeleenthede en besteding in plaaslike gemeenskappe
“Benewens die voordele wat ons infrastruktuurprojekte vir inwoners en besoekers inhou, bevoordeel hierdie projekte ook plaaslike werkers, geteikende ondernemings, plaaslike ondernemings en opkomende kontrakteurs,” het Simmers gesê.
“Tot dusver is 10 458 persoonsdae se plaaslike arbeid op die projek benut teenoor ’n teiken van 11 500. Altesaam 92 werksgeleenthede is geskep teenoor ’n teiken van 135. ’n Bedrag van R10,3 miljoen is aan geteikende ondernemings bestee teenoor ’n teiken van R18,9 miljoen. Goedere en dienste is van vier plaaslike ondernemings verkry teenoor ’n teiken van ses, en van vier opkomende kontrakteurs teenoor ’n teiken van drie,” het hy bygevoeg.