Johannesburg se metroraad is ’n misdaadinstelling. Dié skokbevinding word gemaak in ’n verslag “Joburglary: Assessing the Crime-Council Ecosystem in the City of Johannesburg”.
Die verslag is opgestel deur die Global Initiative Against Transnational Organised Crime (GI-TOC) op versoek van die Centre for Development and Enterprise (CDE).
Volgens die CDE skilder die verslag ’n “diep ontstellende prentjie”. Dit wys dat die stad nie net onder swak administrasie, swak instandhouding en gewone munisipale onbevoegdheid ly nie. “Die metroraad het ontwikkel in ’n kragtige misdaad-ekostelsel. Daarin oorvleuel politieke, sake- en misdadige belange deur voordeel te trek uit die disfunksionaliteit van die plaaslike regering.”
Munisipale begrotings, verkrygingstelsels, aanstellings en dienslewering skep ideale omstandighede vir grootskaalse korrupsie. Om dit uit te buit, word politiek gemanipuleerde komitees en senior aanstellings gebruik om tenderprosesse te verongeluk.
In ander gevalle werk korrupte amptenare saam met buite-misdadigers wat betrokke is by infrastruktuurdiefstal, sabotasie en die onwettige besetting van geboue – dit terwyl sommige amptenare hulself skuldig maak aan direkte afpersing.
Die potensiële wins uit korrupte aktiwiteite skep aansporings wat direk tot institusionele en stedelike agteruitgang bydra. Namate infrastruktuur verval, word noodverkryging en swak wetstoepassing bykomende geleenthede vir winsbejag.
Misdaad-ekostelsel se drie vlakke
Hierdie misdaad-ekostelsel bestaan uit drie oorvleuelende vlakke:
- Op die boonste vlak: Politieke vangnette vir munisipale entiteite en hul verkrygingsprosesse. Politieke invloed by opdragte aan senior amptenare vertroebel die nodige skeidslyn tussen politieke oorsig en operasionele besluitneming. Dit skep ruimte vir tenders om gemanipuleer, oordryf of rigtinggewend aan bevriende sakebelange toegeken te word.
- Op die tweede vlak: Misdaadnetwerke waarby amptenare, kontrakteurs en misdadigers betrokke is en wat rondom dienste soos elektrisiteit, water en eiendom bedryf word.
- Op die derde vlak: Direkte vorms van misdadigheid, insluitend afpersing deur munisipale werknemers of kontrakteurs. Geweld en intimidasie is deurlopende drade wat deur al drie hierdie vlakke loop. Dit dien as beskerming vir korrupte belange en word teen ondersoekers, fluitjieblasers, politici en bona fide sakeondernemings ingespan.
Die verslag is die vyfde deel van die CDE se reeks oor Johannesburg, wat die afgelope weke bekendgestel is, “Johannesburg Matters. Fixing South Africa’s Growth Engine”.
Die verslae word saamgestel onder leiding van Ann Bernstein, uitvoerende hoof van die CDE, en Stefan Schirmer, direkteur van navorsing. Al die verslae kan afgelaai word by www.cde.org.za.
- Lees die volledige artikel oor dié kwessie in Die Papier, wat nou op die rakke is.
- Huisaflewering is ook beskikbaar deur On the Dot te e-pos by diepapierintekening@onthedot.co.za of te bel by 087 353 2191.
- ’n Elektroniese koerant kan ook gekoop word by op novanews.co.za/diepapier of by Magzter.
