Springbok-assistentafrigter Duane Vermeulen het Jasper Wiese geloof, wat Saterdag teen die Wallabies sy 50ste toets vir Suid-Afrika sal speel.
Wiese begin die wedstryd op die plaasvervangersbank nadat hy ’n uitstekende vertoning gelewer het in die pas afgelope 3-1-oorwinning in die Greatest Rivalry Series teen die All Blacks.
Vermeulen, wat tydens sy speeldae een van die uitblinkers onder die Springbok se nr. 8’s was, sê Wiese het ’n ware leier in die Bok-groep geword.
“Dit is ongelooflik hoe vinnig die tyd verbygevlieg het,” het Vermeulen gesê.
“Jasper het baie vinniger as ek daar gekom, en hy is ’n fantastiese speler en ’n ware staatmaker in die span. Hy het ook oor die afgelope paar jaar een van die kernleiers in die groep geword.
“Hy is die man na wie jy gaan as jy vorentoe wil beweeg, en hy speel baie goed. Dit is ’n fantastiese prestasie en daar lê nog baie meer vir hom voor. Ek het die tyd geniet toe ek saam met hom gespeel het, en om hom af te rig is net so lekker.”