Die Bloemfontein Vereniging vir Model-ingenieurs vier volgende jaar sy 70ste bestaansjaar.
Steeds word daar hard gewerk om Modensopark in Bayswater, waar kinders Sondae op modeltreintjies kan ry, ‘n lekker bestemming vir oud en jonk te maak.
Klublede het onlangs ‘n werknaweek gehou waar aan die wisselaars gewerk is, tonnels skoongemaak is en van die klub se junior lede met verfkwaste ingespring en verfwerk gedoen het. Een van die ywerige klublede, Heinrich Lategan, sê daar is baie planne om die terrein te verbeter om dit vir besoekers ‘n lekker bestemming te maak.
“Dit is ‘n heerlike uitstappie waar jy jou piekniekmandjie kan pak en die dag as gesin saamkuier. Ons gaan nuwe braaiplek vir die publiek bou en daar is nou Sondae skaal- model treintjies waarna besoekers in die klubhuis kan kom kyk.”
Charl van Aswegen, die voorsitter van die klub, sê modeltreintjies is ‘n outydse stokperdjie wat kinders gou fassineer.
“Ritte is deur die jare steeds bekostigbaar. Ek onthou die dae toe dit net 20c vir kinders en 50c per volwassene gekos het. Ons het pannekoek verkoop om geld in te samel om die klubhuis te bou.”
Die klub het nou sowat 30 lede en kinders word aangemoedig om by die klub aan te sluit. Die klub het vyf aktiewe enjins wat treintjies sleep waarop groot en klein kan ry. In die winter is Modensopark Sondae van 13:00 tot 16:00 oop. Elke treinrit kos net R10 per persoon.
You must be logged in to post a comment.