Die ANC kan en wil nie ons erfenis beskerm nie.

So sê Armand Cloete, VF Plus-lid van die Vrystaatse Wetgewer, oor die onlangse inbraak by die Ou Presidensie.

Tankiso Zola, woordvoerder van die departement sport, kuns, kultuur en rekreasie het bevestig dat daar ‘n inbraak by dié museum in President Brandstraat in die stad was.

“Die saak is by die polisie aangemenld en hulle ondersoek dit nog,” het Zola aan BloemNuusExpress gesê.

Cloete sê die Ou Presidensie, wat onder dié departement val, is reeds jare onderbefonds. “Die infrastruktuur word nie behoorlik in stand gehou nie. ‘n Inbraak van dié aard wys ook hoe diep misdaad reeds in alle aspekte van die samelewing ingegrawe is.”

Lees ook: Klein lig in die tonnel vir Bloemfontein se vervalle Pres. Brandstraat.

Cloete sê dit is ‘n skande. “Die items in die Ou Presidensie is van onskatbare waarde en dit wat nou gesteel is, is vir toekomstige geslagte verlore.”

Zola sê die departement se veiligheids-afdeling ondersoek nou die veiligheid van die museum.

Volgens ‘n ingeligte is twee borsbeelde van presidente onder die kosbaarhede wat gesteel is.

Daar was blykbaar geen krag tydens die inbraak die naweek nie.