‘n Bloemfonteinse man veg om sy lewe in die Pelonomi Netcare-intensiewesorgeenheid ná ‘n ongeluk op ‘n pad in Ferreira Vrydag 23 Oktober.

Raymond Morton (47) het sy nek op drie plekke gebreek, sy neus sleg gebreek en hy het bloeding op die brein.

Karen de Wet, Raymond se verloofde, sê hy is ernstig beseer toe hy Vrydag op ‘n grondpad met sy motorfiets gery het en in ‘n botsing met ‘n motor op die aansluiting by die Ferreira-pad betrokke was. “Hy het sy valhelm op gehad, maar steeds baie seergekry.”

Hy is in ‘n medies geïnduseerde koma en sy familie bid vir sy lewe.

LEES OOK: Bloemfontein-gesin dankbaar vir hulp nadat brand huis verwoes.

” ‘n Vriend van ons wat tans in die hospitaal behandeling ontvang, was gisteraand by Raymond om vir hom te bid,” vertel Karen. “Hy sê hy kon voel Raymond is nie alleen in die kamer nie. Ek het dit gister ook daar by hom beleef in die hospitaalkamer. Ons glo daar is ‘n beskermengel wat vir Raymond bewaar.”

Karen sê Raymond het onlangs sy werk verloor en hy was die enigste broodwinner van die huisgesin. “Sy famile is reeds onder soveel druk, die ongeluk maak ‘n moeilike situasie onhoudbaar,” sê sy.

‘n BackaBuddy-veldtog is intussen oopgemaak om die gesin geldelik te ondersteun. Sien meer inligting hier.