Inwoners in die oostelike dele van Worcester sal môreoggend sonder water wakker word nadat die onlangse stormweer uitgebreide skade aan die dorp se hoofwatertoevoerinfrastruktuur aangerig het.
Die Stettynskloof-waterpyplyn, wat die hoofwatertoevoerkanaal na opgaartenks in Worcester en Rawsonville is, is erg beskadig en voer nie meer water na die dorp nie.
Alle gebiede oos van die N1 sal vanaf môre, 14 Mei 2026, sonder water wees aangesien huidige reservoirvlakke na verwagting tydens die nag sal leegloop.
Breedevallei-munisipaliteit (BVM) het dié nuus Woensdagaand op sy Facebook-blad bevestig. Volgens ‘n video waarin BVM se senior bestuurder van waterdienste, Jevon Pekeur, die omvang van die situasie aan inwoners verduidelik, is ‘n gedeelte van die pyplyn deur vloedwater weggespoel.
Die BVM se ingenieursspanne kon vandag (13 Mei), deur middel van lughelikopers, eers toegang tot die beskadigde terrein kry om die volle omvang van die skade te assesseer. Toegangspaaie na die geaffekteerde gebied bly egter erg beskadig en gedeeltelik ontoeganklik, wat herstelwerk bemoeilik.
“Noodherstelwerk is aan die gang om toegang vir swaar masjinerie en herstelspanne te herstel,” het die munisipaliteit in ‘n verklaring gesê.
KYK| Jevon Pekeur, senior bestuurder van waterdienste by die Breedevallei-munisipaliteit verduidelik die omvang van die situasie.
Die munisipaliteit sal watertenkers regdeur geaffekteerde gemeenskappe ontplooi as ‘n noodingrypingsmaatreël. Openbare staanpype sal vanaf vroegoggend in die Panorama- en Van Riebeeck Park-gebiede oopgemaak word om noodtoegang tot water van brandkrane in gebiede met water, te bied. Dié gebiede, insluitend Fairway Heights, sal steeds water hê aangesien hulle hul water van die Faerie Glen-dam en die De Koppen-watersuiweringswerke ontvang.
Watertenkersdienste sal later die oggend, rondom 10:00, operasioneel raak soos addisionele ondersteuningshulpbronne aankom. Die munisipaliteit het nog nie spesifieke liggings of tye vir tenkerstasies bevestig nie.
Die Provinsiale Rampbestuursentrum is in kennis gestel en gevra om bystand te verleen. Kritieke fasiliteite en kwesbare gebiede ontvang prioriteitsaandag as deel van die noodreaksieplan.
Inwoners word aangemoedig om water spaarsamig te gebruik waar dit nog beskikbaar is en om saam te werk met munisipale spanne en noodpersoneel terwyl hersteloperasies voortduur.
Die munisipaliteit het gesê dit sal verdere opdaterings oor watertenkerliggings en tydsberamings verskaf soos meer inligting beskikbaar raak.
