VELDDRIF – Besoekers aan die bekende én historiese Bokkomlaan word deesdae deur ‘n besonderse gasheer verwelkom – ‘n reier wat hom by die plaaslike winkels tuisgemaak het.

Marius Snyders het Maandag 12 Oktober dié toneel vasgevang. Die voël het rustig by een van die winkels sit en wag – amper of hy self uitbeeld: “Jip, ons is oop, maar ek hou wag oor die vangste!”

Volgens Wikipedia word meer as 15 spesies reiers in Suider-Afrika aangetref. Reiers is bekende watervangvoëls wat veral by riviere, vleilande en kusvissersgebiede voorkom. Die voëls is bekwame vissers wat bewegingloos in of naby water kan staan en met hul skerp snawels ongelooflik vinnig vang. Verskeie reierspesies is veral snags of in die skemer aktief.

Dié reier was egter nie die enigste besienswaardighede in Bokkomlaan nie. ‘n Pop wat elke oggend sitgemaak word vir besoekers om te aanskou, sowel as ‘n kreatiewe “Velddrif CBD”-skildery op een van die mure, voeg karakter tot die area by.

“Die ‘Velddrif CBD’ op die muur is ‘n juweeltjie!” sê Snyders.

Die area met sy unieke dekor en geveerde besoekers is beslis ‘n besoek werd vir toeriste en plaaslike inwoners.

LEES OOK: KYK | Bergrivier se watervlak styg in Velddrif: Bokkomlaan hou asem op