Die Saldanha-wetenskapsentrum, Lethemba Care Projects en die Weskus-fossielpark het onlangs kragte saamgesnoer in ‘n belangrike inisiatief wat daarop gemik is om van die mees kwesbare jongmense in die omliggende gemeenskappe te ondersteun.
Xavier Lawrence, die be- stuurder van die Saldanha-wetenskapsentrum, sê hulle het in samewerking met Lethemba ‘n groep jongmense geïdentifiseer wat ernstige uitdagings in die gesig staar.
Sommige is uit die skool geskors, ander het uitgeval en verskeie was werkloos. Wat hulle in gemeen het, is die behoefte aan leiding, motivering en die gerusstelling dat hul toekoms steeds vol moontlikhede is.Die Weskus-fossielpark het toe ‘n onvergeetlike ervaring bygevoeg deur die leerders op ‘n begeleide toer van hul historiese fossielterrein te neem.
“Vir baie was dit hul eerste besoek aan hierdie wêreldklas erfenisligging. Die verwondering op hul gesigte terwyl hulle die prehistoriese landskappe verken het, het ons daaraan herinner hoekom blootstelling saak maak: – “Jongmense kan nie streef na iets wat hulle nog nooit gesien het nie,” sê Lawrence.
“Hierdie samewerking was meer as net ‘n daguitstappie; dit was ‘n herinnering vir hierdie jongmense dat die gemeenskap vir hulle omgee.”
“Dit het hulle gewys dat hulle nie vergeet word nie en dat ondersteunende ruimtes steeds bestaan om hulle te help om hul selfvertroue en rigting te herbou.”
