Die jongste prysvergelyking van kruideniersware en brandstof in die Saldanhabaai- munisipale gebied en Velddrif bevestig weer eens dat Velddrif die billikste dorp vir verbruikers bly, terwyl U-Save die oorwinning as die winkelgroep met die laagste pryse behaal.

Die data, wat van Januarie tot Mei vanjaar deur dr. Clive Coetzee en sy familie versamel is, toon dat ‘n standaardmandjie van 20 alledaagse artikels in Velddrif gemiddeld R974,47 kos, die laagste van die vyf dorpe wat ondersoek is.

St. Helenabaai is die duurste dorp met ‘n gemiddelde mandjie van R1 042,59, ‘n verskil van R68,12 of 7% meer as Velddrif.

Pryse per dorp

Saldanha (R994,48) en Langebaan (R996,25) is amper dieselfde, terwyl Vredenburg (R985,98) ook relatief bekostigbaar bly.

Die grootste prysverskille tussen dorpe word gesien vir lamtjops (loin chops/mutton). In St. Helenabaai kos dit gemiddeld R264,57 per kilogram, vergeleke met R215,24 in Vredenburg, ‘n skokkende verskil van amper R50.

Volroommelk (2 liter) se prys is die laagste in Langebaan (R33,99) en die hoogste in Saldanha (R36,76). Heel hoenders kos die minste in St. Helenabaai (R52,79 per kilogram) en die meeste in Vredenburg (R60,99).

Winkelgroepe

Onder kleinhandelkettingwinkels is U-Save die onbetwiste wenner met ‘n gemiddelde mandjie van slegs R822,25, amper R90 minder as Checkers (R910,81), die duurste kettingwinkelgroep.

Spar kom tweede met R854,75, gevolg deur Food Lovers Market (R855,01), Shoprite (R858,48), PnP (R890,42) en OK (R896,02).

Interessant genoeg is eiers se prys die laagste by Spar (R16,13 vir ses), terwyl Checkers R25,66 vra, amper 60% meer.

Melk kos dramaties minder by U-Save (R31,12 vir 2 liter) as by OK (R37,45).

Maalvleis kos R82,49 per kilogram by Checkers, maar slegs R72,12 by U-Save – ‘n verskil van R10,37.

Tamatiepryse styg

Een van die kommerwekkendste tendense in die vyfmaande-data is die styging in tamatiepryse. Van R24,07 per kilogram in Januarie vanjaar het tamatiepryse gestyg tot ‘n skokkende R42,56 in Mei – ‘n toename van 77%.

Hierdie drastiese toename word waarskynlik toegeskryf aan seisoenale faktore en droogtetoestande in produksiegebiede.

Ander goedere wat beduidende prysstygings getoon het, sluit in:

• Lamtjops: Van R208,66 in Januarie tot R239,78 in Mei (+15%).

• Uie: Van R18,02 tot R22,99 (+28%).

• Wortels: Van R14,57 tot R21,06 (+45%).

Basiese kosprodukte

Nie alles het egter duurder geword nie. Rys se prys het aansienlik gedaal van R41,82 in Januarie tot R34,71 in Mei (−17%), terwyl maalvleis ook effens gedaal het van R127,99 tot R116,85 (−9%).

Pasta het stabiel gebly rondom R18 – R20, en suiker het min verander (R61,24 in Januarie vergeleke met R61,70 in Mei).

Brandstofpryse skok verbruikers

Dieselpryse het die grootste knou aan verbruikers se beursies toegedien. Die ­gemiddelde dieselprys per liter het gestyg van ongeveer R19,50 in Februarie tot meer as R33 in Mei, ‘n toename van byna 70%.

Die laagste dieselprys is deurgaans by Total (Silos) Vredenburg gevind (R31,90 in Mei), terwyl St. Helenabaai Total (R33,94) en Langebaan Engen (R34,17) die duurste was.

Velddrif Elegant en Velddrif Engen bied ook goeie waarde met dieselpryse van onderskeidelik R31,98 en R31,99 in Mei.

Belangrike bevindings

Dr. Coetzee se ontleding toon duidelik dat verbruikers wat slim inkopies doen aansienlik kan bespaar:

• Doen inkopies in Velddrif vir die laagste algehele pryse.

• Gebruik U-Save en Spar vir die beste waarde in kruideniersware.

• St. Helenabaai is gemiddeld 7% duurder vir algemene inkopies.

• Koop diesel in Vredenburg of Velddrif.