Die Saldanhabaai-munisipaliteit het die afgelope Donderdag (30 April) ‘n suksesvolle uitreikbesoek aan Jolly Tots Crèche en Potter’s House Hope Centre in Louwville gebring, waar altesaam 70 kinders bereik is.
Die inisiatief vorm deel van die munisipaliteit se voortgesette gemeenskapsbewusmakingsprogramme met ‘n sterk fokus op vroeëkinderontwikkeling. Die doel is om verantwoordelike gedrag, omgewingsbewustheid en veiligheidskennis reeds op ‘n jong ouderdom by kinders te vestig.
Die dag is gekenmerk deur groot opgewondenheid toe die munisipaliteit se gewilde maskotte die kinders besoek het:
Ranger die Rubbish Rescuer, wat die belangrikheid van ‘n skoon en gesonde omgewing beklemtoon het; Druppeltjie, die Gebruik Water Wyslik-maskot, wat kinders geleer het dat elke druppel water kosbaar is en nie vermors moet word nie, en Daantjie Kat, die Padveiligheid-maskot, wat praktiese wenke oor veilige gedrag op en langs die pad gedeel het.
Die programme is op ‘n interaktiewe en speelse wyse aangebied, wat dit vir die kinders maklik gemaak het om die boodskappe te verstaan, dit te geniet en alles te onthou.
As ekstra hoogtepunt het ‘n spesiale gasverskyning deur Mickey Mouse groot vreugde en entoesiasme onder die kinders gebring, wat die ervaring nog meer onvergeetlik gemaak het.
Die besoek is deur beide instellings baie positief ontvang.
Silvia Volmoer, die hoof van Potter’s House Hope Centre, het gesê die besoek was ‘n waardevolle geleentheid vir die kinders om te leer en te groei. René Famer, die hoof van Jolly Tots Crèche, het ook haar waardering uitgespreek en aangedui dat die besoek baie goed en leersaam was.
Die doel van die uitreik was nie slegs om kennis oor te dra nie, maar ook om kinders te inspireer om van jongs af verantwoordelike keuses te maak.
“Saam bou ons ‘n veiliger, skoner en beter toekoms vir almal.”
