Die nood in die Weskus het Carmen Rodgers aangespoor om in haar gemeenskap terug te ploeg.
Dié inwoner van Langebaan het die organisasie Community Without Borders in 2023 gestig om dit wat sy in gemeenskappe as noodsaaklik beskou, aan te pak.
“In byna elke gemeenskap kry ‘n mens kinders wat honger skool toe gaan, vroue wat sukkel om ekonomiese onafhanklikheid te verkry, jongmense wat geen toegang tot veilige ontwikkelingsruimtes het nie en bejaardes wat in stilte en eensaamheid oorleef. Hierdie werklikhede het ‘n dringende wekroep geword, ‘n roep na ‘n organisasie wat nie net noodhulp verskaf nie, maar ware waardigheid herstel en langtermyngeleenthede skep.
“Die visie was eenvoudig, maar diep – om ‘n beweging te bou wat grense afbreek, mense verenig en die gemeenskap self die draers van verandering maak.
“Communities Without Borders is daarom nie net nóg ‘n organisasie nie; dit is ‘n reaksie op ‘n werklike behoefte aan samehorigheid, ondersteuning en volhoubare groei,” meen Rodgers.
Community Without Borders het sedert 2024 met gestruktureerde programme oor die Weskus heen begin met die meeste aktiwiteite in die Saldanhabaai-munisipaliteit. Die organisasie het sedertdien uit ‘n klein gemeenskapsinisiatief tot ‘n streekwye ontwikkelingsinstansie met sterk vennootskappe gegroei.
Rodgers meen voedselsekerheid is een van die hoofpilare van hul werk.
“Vir baie maande het die weeklikse kos-skenkings letterlik die verskil tussen oorleef en honger vir honderde families gemaak.
“Hierdie skenkings is wyd deur die Weskus versprei en het ‘n tasbare invloed gehad in ‘n streek waarin werkloosheid en armoede skerp styg.
“Die organisasie glo onwrikbaar dat die jeug die spilpunt van elke gemeenskap se toekoms is – daarom word aktief in programme belê wat kinders en jongmense aan lewensvaardighede, sport, kultuur en positiewe ervarings blootstel.”
Een van die grootste projekte wat Community Without Borders na aan die hart lê en wat nog vanjaar aangepak gaan word, is die Weskus-Kersfeesprojek, gemik daarop om kinders uit verskeie dorpe ‘n onvergeetlike dag van vreugde, liefde en bederf te gee. “Die werklikheid is dat baie kinders in ons gemeenskappe nooit die geleentheid kry om ‘n regte Kersfees-viering te ervaar nie – geen geskenke; geen partytjie; geen bederf. Daarom is hierdie projek meer as net ‘n geleentheid; dit is ‘n daad van hoop.
“Ons beplan ‘n dag waar kinders verwelkom word met speletjies, vermaak, lekkergoed, warm kos en natuurlik ‘n Kersgeskenk wat spesifiek vir elke ouderdomsgroep gepak word. Die doel is om ‘n veilige, feestelike ruimte te skep waar kinders kan lag, speel, dans en vir ‘n oomblik net ongekompliseerde kind wees kan geniet. Die projek vereis aansienlike hulpbronne soos speelgoed, versierings en lekkernye tot logistieke ondersteuning, vervoer en finansiële skenkings.
“Ons doen daarom ‘n beroep op die breër Weskus-gemeenskap, sake-ondernemings en inwoners om betrokke te raak en hierdie dag moontlik te maak.
As jy betrokke wil raak, kontak Carmen Rodgers by 072 551 2182.
