ATLANTIS – Met die skoolvakansie en Erfenisdag-langnaweek wat saamval met ‘n sterk springgety, is inwoners en vakansiegangers aangemoedig om ekstra versigtig te wees.
Die Nasionale Seereddingsinstituut (NSRI) waarsku strandgangers, hengelaars, stappers en enigiemand wat tyd by die see, riviere, damme of ander watermassas deurbring, om hul aktiwiteite rondom die weer, gety en plaaslike omstandighede te beplan.
Die volmaan was Saterdag (26 September) om 18:48, waarna die grootste getyverskille gewoonlik ‘n dag of twee later steeds voorkom. Die sterkste springgetye was van ongeveer Saterdag en word tot vandag (Dinsdag 29 September) verwag.
Die springgety volg kort ná die ewening op 23 September (ewening is wanneer die dag en nag presies ewe lank is). Springgetye is gewoonlik van die sterkste gedurende ‘n ewening. Dit gebeur wanneer die son, maan en aarde in lyn is, wat die maan se aantrekkingskrag op die oseane versterk.
‘n Springgety kan tot hoër hoogwater en laer laagwater lei, wat beteken dat die verskil tussen hoog- en laagwater groter as gewoonlik is. Sterker getystrome kan ook gevaarliker toestande by riviermondings, hawens en nou waterweë veroorsaak.
Die NSRI waarsku dat sterker getystrome ook sleurstrome kan versterk. Kuspaadjies en staproetes kan met hoogwater afgesny word, terwyl golwe tydens hoogwater gebiede kan bereik wat gewoonlik veilig lyk.
Swemmers word aangeraai om slegs by strande met menseredders en binne die gemerkte gebied tussen die vlae te swem. Hengelaars wat van rotse af visvang, moet weg van die waterkant bly, ‘n reddingsbaadjie dra en iets saamneem wat as dryfhulpmiddel gebruik kan word.
Die NSRI herinner mense ook daaraan om ekstra versigtig by riviere, damme en mere te wees – veral ná reën wanneer watervlakke vinnig kan styg en strome sterk kan wees.
Kinders moet te alle tye onder die toesig van ‘n verantwoordelike volwassene wees wanneer hulle naby water is. Alkoholgebruik moet vermy word. In ‘n noodgeval kan die NSRI by 087 094 9774 of 112 vanaf ‘n selfoon gekontak word.
