Kaapstad se grootste Christelike radiostasie, Radio Tygerberg 104FM in Parow, is onlangs vereer met die “Faith that Counts” toekenning wat jaarliks deur die Vereniging vir Christelike Media toegeken word.
Dit is aan Radio Tygerberg toegeken vir die Healing the City/Mighty Men Kaapse Vlakte-inisiatief verlede jaar.
Dié inisiatief is reeds in 2024 gebore nadat ‘n Kaapse dagblad berig het dat 120 mense in net ses dae op die Kaapse Vlakte dood is. Die berig het op bladsy 9 verskyn wat dit laat lyk asof so ‘n tragedie normaal geword het, sê ‘n woordvoerder.
Mighty Men
In reaksie hierop is pastore en gemeenskapsleiers na die stasie genooi om te bepaal hoe die radiostasie betekenisvol op hierdie krisis kon reageer. Daar het twee duidelike prioriteite na vore gekom: die behoefte aan trauma-opleiding om daardie gesinne en gemeenskappe wat deur bendegeweld geraak word, toe te rus, en ‘n Mighty Men-byeenkoms om mans op te roep om op te staan en verantwoordelikheid in hul huise en gemeenskappe te neem. Van daardie oomblik af is ‘n beweging gebore — toegewy daaraan om hoop, genesing en transformasie na die Kaapse Vlakte te bring, sê die radiostasie.
“Die Mighty Men-byeenkoms, op 1 November verlede jaar, was ‘n dapper en dringende reaksie op ‘n gemeenskap in ‘n krisis,” sê Rikus van Rooy, stasiebestuurder. “Ons is dankbaar dat die Healing the City-inisiatief steeds voortgaan deur trauma-opleiding wat gratis in gemeenskappe aangebied word.”
LEES OOK: Radio Tygerberg vier 28 jaar van getroue bediening deur dr. Raymond Lombard
