Vinnige optrede deur beamptes van die Voortrekkerweg-korridorverbeteringsdistrik (VRCID) het tot die aankeer van twee verdagtes gelei weens die besit van gesteelde eiendom in die Bellville-gebied.
Vroeg Woensdagoggend 13 Mei het VRCID- openbare veiligheidsbeamptes gereageer op inligting oor twee verdagtes wat traplere naby AJ West Park gedra het. Die beamptes het hulle onmiddellik na die gebied gehaas en die verdagtes ondervra.
By aankoms het die beamptes gevind dat die twee mense twee beskadigde traplere in hul besit gehad het – lere wat blykbaar by woonstelle in Durbanweg gesteel is. Volgens inligting het die voorval vroeg die oggend plaasgevind toe die verdagtes die lere by ‘n woonkompleks in die omgewing gesteel het.
Wat die saak nog ernstiger maak, is dat die verdagtes besig was om die lere te probeer vernietig om dit as skrootmetaal te verkoop – ‘n poging om bewyse uit te wis. Gelukkig het die vinnige optrede van die VRCID-beamptes dit verhoed.
LEES OOK: Fienie Nimb groet die polisie
Volgens kapt. Charles Neelse van die Bellville-polisiekantoor is ‘n klaer opgespoor, en die verdagtes is in hegtenis geneem en aan die Bellville-polisie oorhandig. Albei verdagtes is in hegtenis geneem op aanklagte van die besit van gesteelde eiendom. Die twee traplere is ook terugbesorg aan die kontrakteur, die wettige eienaar.
Die VRCID se volgehoue teenwoordigheid en proaktiewe benadering tot openbare veiligheid in die Voortrekkerweg-korridor dra by tot ‘n veiliger gemeenskap vir inwoners en sake-ondernemings in die Bellville-gebied.
