Laerskool Bellville-Noord het Saterdag 11 April hul eerste rugbydag vir juniorspanne aangebied, met vyf skole wat elk met o.7, o.8 en o.9-spanne deelgeneem het.
Die deelnemende skole was Bellville-Noord, De Tyger (Parow), Drakenstein (Paarl), Riebeeck-Kasteel en WA Joubert (Paarl). Al die spanne het in hul onderskeie ouderdomsgroepe teen mekaar meegeding.
Nuwe spelreëls
Die o.7- en o.8-spelers het vir die eerste keer “tag”-rugby volgens nuwe reëls gespeel, terwyl die o.9’s gewone rugby gespeel het met skrums en lynstane wat deur ‘n “tikkie” vervang is.
Die dag is deur Rawson Eiendomme Bellville Oakglen geborg – dieselfde maatskappy wat ook die skool se gewilde mini-krieketdag verlede kwartaal geborg het. Rugga Roots rugby-akademie het al die skeidsregters voorsien.
Ten spyte van dreigende weer het die reën lank genoeg weggebly vir al die wedstryde om voltooi te word. Die skool se ouervereniging het eetgoed verkoop, en die skool se gelukbringer, Maximus Meerkat, was ‘n groot treffer onder die kinders.
