Inwoners en kinders van Riverside Gardens het Saterdag 18 Julie hul 67 minute vir Mandeladag gebruik om die buurt bietjie skoner te maak.

Die groot skoonmaak-operasie is deur Lousie Erasmus en haar span wat ‘n voedingskema in die buurt bedryf, gereël. Die kinders het geleer dat hulle nie rommel moet strooi nie en hul omgewing skoon en netjies moet hou.

Hungry Lion en OK Foods Highbury het iets te ete vir die kinders voorsien. Food Lover’s Market het keppies en vrugte geskenk en aQuelle het water voorsien.

Hulle is deur die Stad Kaapstad, wat verf, besems en swartsakke verskaf het, asook militêre veterane, bygestaan.

Die verkeersafdeling, metropolisie en Kuilsrivier-polisie het ‘n ogie gehou en sommer ook self ingespring en help skoonmaak, sê Adriaan Erasmus.

Mandeladag, wat jaarliks op 18 Julie gevier word, moedig mense aan om 67 minute van hul tyd af te staan om hul gemeenskappe te help, wat een minuut verteenwoordig vir elke jaar wat oud-president Nelson Mandela aan sosiale geregtigheid gewy het.

Gallery

Foto’s: verskaf

LEES OOK: Bewusmakingsdag in Riverside Gardens, Kuilsrivier gehou